وڭتۇستىكتەن سولتۇستىككە 66,2 مىڭ ادام كوشىپ، ونىڭ 3,6 مىڭى كەرى قايتقان. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى، دەپ حابارلايدى “ادىرنا”.
“ۇلتتىق ستاتيستيكا بيۋروسىنىڭ 2025 جىلدىڭ 9 ايداعى دەرەكتەرى بويىنشا 1 326 مىڭ ادام قونىس اۋداردى. ونىڭ ىشىندە وبلىستار اراسىندا 619 مىڭ ادام قونىس اۋدارعان. بۇل 2024 جىلدىڭ ۇقساس كەزەڭىنەن 22,7% جوعارى (1 080 مىڭ ادام). بۇگىندە ەرىكتى تۇردە قونىس اۋدارۋ تەتىگى وڭتۇستىك وڭىرلەردەن سولتۇستىك وڭىرلەرگە ەڭبەك رەسۋرستارىن قايتا بولۋگە جانە جۇمىس ىزدەپ جۇرگەن ادامدارعا، جۇمىسسىزدارعا جۇمىسقا ورنالاسۋعا جاردەمدەسۋگە باعىتتالعان نەگىزگى شارالاردىڭ ءبىرى بولىپ تۇر. ماسەلەن، باعدارلاما باستالعان كەزدەن بەرى سولتۇستىك وڭىرلەرگە 66,2 مىڭ ادام قونىس اۋداردى. ونىڭ 3,6 مىڭ ادامى نەمەسە 6%-ى قايتىپ ورالدى”، — دەلىنگەن رەسمي مالىمەتتە.
مينيسترلىكتەگىلەر ميگراتسيانى رەتتەۋ شارالارى حالىق ازايىپ جاتقان وڭىرلەردەگى كوشى-قوننىڭ تەرىس سالدوسىن باسەڭدەتكەنىن ايتادى.
“قونىس اۋدارۋ بويىنشا قابىلدانىپ جاتقان شارالاردىڭ ارقاسىندا قونىس اۋدارۋ وڭىرلەرىندە كوشى-قوننىڭ تەرىس سالدو دەڭگەيىن 2019 جىلمەن سالىستىرعاندا 36%-عا نەمەسە-19 مىڭ ادامعا (-53 مىڭ ادام) تومەندەتۋگە مۇمكىندىك تۋدى”، — دەلىنگەن جاۋاپتا.
