قازاقستان حالقى اسسامبلەياسىنىڭ 30 جىلدىعى مەن «جۇمىسشى ماماندىقتار جىلى» اياسىندا اقمولا وبلىسىنداعى «Kazrost Engineering Ltd» كاسىپورنىندا قحا «ەڭبەككەرلەر اسسامبلەياسىنىڭ» اشىلۋىنا ارنالعان سالتاناتتى ءىس-شارا ءوتتى.
شاراعا اقمولا وبلىسى اكىمىنىڭ ورىنباسارى دوسۇلان ايتباەۆ قاتىستى. ول «ەڭبەككەرلەر اسسامبلەياسى» — قوعامداعى جالپىۇلتتىق بىرلىكتى ساقتاۋ تۇرعىسىنان ەرەكشە الەۋمەتتىك ماڭىزى بار جوبا ەكەنىن اتاپ ءوتتى.
بۇعان دەيىن اقمولا وبلىسىندا ەڭبەككەرلەر اسسامبلەياسى «ستەپنوگورسك تاۋ-كەن-حيميا كومبيناتى» جشس-ندا اشىلعان بولاتىن. «Kazrost Engineering Ltd» — وڭىرىمىزدەگى اۋىل شارۋاشىلىعى تەحنيكاسىن وندىرەتىن وتاندىق كاسىپورىن. مەكەمەدە ءتۇرلى ەتنوس وكىلدەرى قىزمەت ەتەدى، ۇجىمداعى ءوزارا سىيلاستىق پەن ىنتىماقتاستىققا كوپ كوڭىل بولىنەدى.
كاسىپورىننىڭ اتقارۋشى ديرەكتورى اندرەي انتروپوۆ ەڭبەككەرلەر اسسامبلەياسىنىڭ كاسىپورىن بازاسىندا اشىلۋى — قىزمەتكەرلەر اراسىنداعى كورپوراتيۆتىك مادەنيەتتى ودان ءارى نىعايتۋعا مۇمكىندىك بەرەتىنىنە ەرەكشە نازار اۋداردى. ءىس-شارا بارىسىندا قاتىسۋشىلار وندىرىستىك تسەحتاردى ارالاپ، كاسىپورىننىڭ جۇمىسى مەن ءوندىرىس پروتسەسىمەن تانىستى.
شارا كەزىندە كاسىپورىننىڭ دامۋىنا جانە ۇجىمدىق ءىس-شارالارعا ەلەۋلى ۇلەس قوسقان تەمىرلان بالاباي، ەۆگەني ريابينين، دانيار ينكاروۆ جانە سەرىكجان باۋكەنوۆ وبلىس اكىمىنىڭ ورىنباسارىنىڭ العىس حاتتارىمەن ماراپاتتالدى. «Kazrost Engineering Ltd» كاسىپورنىنىڭ قۇرىلتايشىسى، وبلىستىق اسسامبلەيا مۇشەسى شالۆا دجاحۋتاشۆيلي قحا-نىڭ «بىرلىك» مەدالىمەن ماراپاتتالىپ، ەڭبەككەرلەر اسسامبلەياسى — بىرلىك پەن كەلىسىم قۇندىلىقتارىن دامىتۋعا ارنالعان الاڭعا اينالاتىنىنا ءوز سەنىمىن ءبىلدىردى.
ءىس-شارا سوڭىندا «Kazrost Engineering Ltd» جەكە كومپانياسى مەن اقمولا وبلىستىق حالىق اسسامبلەياسى اراسىنداعى ىنتىماقتاستىقتى نىعايتۋ جانە ەڭبەككەرلەر اسسامبلەياسىنىڭ قىزمەتىن ۇيىمداستىرۋ مەن ۇيلەستىرۋدى قامتاماسىز ەتۋ تۋرالى مەموراندۋمعا قول قويىلدى. قاتىسۋشىلارعا وبلىستىق اسسامبلەيا تاراپىنان دايىندالعان كونتسەرتتىك باعدارلاما ۇسىنىلدى.
