قازاقستان جەلتوقسان ايىندا قاشاعان كەن ورنىنان العاش رەت 50 مىڭ توننا مۇنايدى قىتايعا تىكەلەي جونەلتۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى Reuters-كە سىلتەپ.
بۇل شەشىم ۋكراينا تەڭىز دروندارىنىڭ رەسەيدىڭ نوۆوروسسيسك پورتىنداعى كاسپي قۇبىر كونسورتسيۋمى (كقك) ينفراقۇرىلىمىنا جاساعان شابۋىلىنان كەيىن قابىلداندى. ءداستۇرلى تۇردە قازاقستاندىق مۇنايدىڭ نەگىزگى بولىگى وسى قۇبىر ارقىلى تاسىمالدانىپ كەلگەن.
بۇل تۋرالى 8 جەلتوقساندا Reuters اگەنتتىگى حابارلادى.
وسىعان دەيىن نوۆوروسسيسكىدەگى كقك شابۋىل جاسالىپ، سالدارىنان تەڭىز تەرمينالىنداعى ماڭىزدى ينفراقۇرىلىم نىساندارىنىڭ ءبىرى ىستەن شىققان. قازىرگى تاڭدا ءۇش قۇرىلعىنىڭ تەك بىرەۋى عانا جۇمىس ىستەپ تۇر. ناتيجەسىندە الەمدىك مۇناي جەتكىزىلىمىنىڭ شامامەن 1 پايىزى وتەتىن كقك ەكسپورت كولەمىن قىسقارتۋعا ءماجبۇر بولىپ وتىر.
قاشاعان مۇنايىن قىتايعا جەتكىزۋ اتاسۋ — الاشانكوۋ قۇبىرى ارقىلى جۇزەگە اسىرىلادى. بۇل كەن ورنىن يگەرىپ جاتقان NCOC كونسورتسيۋمىنىڭ قۇرامىندا قىتايلىق CNPC جانە جاپوندىق Inpex كومپانيالارى دا بار.
دەرەككوزدەردىڭ حابارلاۋىنشا، CNPC اتالعان باعىتپەن شامامەن 30 مىڭ توننا، ال Inpex — 20 مىڭ توننا مۇناي جونەلتۋدى جوسپارلاپ وتىر. اتالعان كومپانيالار Reuters ساۋالىنا ازىرگە جاۋاپ بەرمەگەن.
قازاقستاننىڭ ەنەرگەتيكا مينيسترلىگى قاشاعان مۇنايىنىڭ قىتايعا ەكسپورتىن رەسمي تۇردە راستاعان جوق، الايدا كاسپي مۇنايىن جەتكىزۋ ءۇشىن بالاما باعىتتار قاراستىرىلىپ جاتقانىن مالىمدەدى.
مينيسترلىكتىڭ Reuters-كە بەرگەن جازباشا جاۋابىندا:
«كقك تەڭىز تەرمينالىنداعى وقيعا ەكسپورتتىڭ تولىق توقتاۋىنا اكەلگەن جوق. ەنەرگەتيكا مينيسترلىگى مۇناي ءوندىرۋشى كومپانيالارمەن بىرلەسىپ جەتكىزۋ كولەمىن قايتا ءبولۋ بويىنشا جەدەل جۇمىس جۇرگىزىپ جاتىر. بالاما ەكسپورتتىق باعىتتاردى پايدالانۋ كۇشەيتىلدى»، - دەلىنگەن.
Reuters دەرەكتەرىنە ساي، قازاقستان 2025 جىلى وسى باعىتپەن 1 ملن توننا مۇناي جونەلتۋدى جوسپارلاپ وتىر. بۇل 2024 جىلعى 1,2 ملن توننامەن سالىستىرعاندا از. ال جىل باسىنان بەرگى 10 ايدا جەتكىزىلگەن مۇناي كولەمى 858 مىڭ توننانى قۇراعان.
