قازاقستان پرەمەر-ءمينيسترى ولجاس بەكتەنوۆ وزبەكستانمەن شەكارادا جۇك ۆاگوندارىنىڭ شوعىرلانۋىنا جول بەرگەن كومپانيا باسشىلارىن جاۋاپقا تارتۋدى تاپسىردى، دەپ حابارلايدى "ادىرنا" ۇلتتىق پورتالى.
بەكتەنوۆ بۇل تاپسىرمانى «قازاقستان تەمىر جولى» باسقارماسىنىڭ توراعاسى تالعات الدىبەرگەنوۆكە ۇكىمەت وتىرىسىندا بەردى. پرەمەر-مينيستر ماسەلەنى جەدەل ءارى تولىق شەشۋدىڭ ماڭىزدىلىعىن اتاپ ءوتتى.
«بۇل جاعدايعا سەبەپ بولعان كومپانيا جەتەكشىلەرىن جاۋاپقا تارتىڭىزدار. ماعان بايانداڭىزدار»، – دەدى ولجاس بەكتەنوۆ.
تالعات الدىبەرگەنوۆ ءوز كەزەگىندە قازاقستان مەن وزبەكستاننىڭ ءتيىستى قۇرىلىمدارى ماسەلەنى بىرلەسىپ شەشىپ جاتقانىن حابارلادى.
«وزبەكستاندا جەدەل شتاب قۇرىلدى، بارلىق ۋاكىلەتتى ورگاندار تاۋلىك بويى جۇمىس رەجيمىنە كوشتى»، – دەدى ول.
ايتا كەتەيىك، 6 جەلتوقسان كۇنى قازاقستاننىڭ وڭتۇستىگىندە تەمىرجول باعىتىندا ءىرى كەپتەلىس قالىپتاسقانى تۋرالى حابارلانعان.
وزبەكستانعا بەت العان 11 مىڭنان استام جۇك ۆاگوندارىنىڭ باسىم بولىگى استىق تاسىمالدايدى. كەيبىر پويىزداردىڭ كىدىرىسى 5–6 تاۋلىكتەن اسقان.
