وزبەكستان اەس-كە قاجەتتى سالقىنداتۋ جۇيەسىن ماجارستاننان الادى. بۇل جونىندە Uzatom اگەنتتىگى مەن ماجارستاننىڭ «MVM EGI» مەملەكەتتىك كاسىپورنى اتوم ەنەرگەتيكاسى سالاسىنداعى ىنتىماقتاستىق كەلىسىمىنە قول قويدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
قۇجاتقا سايكەس، «MVM EGI» كاسىپورىنى وزبەكستاندا بوي كوتەرەتىن اتوم ەلەكتر ستانتسياسىنا قاجەتتى قۇرعاق سالقىنداتۋ جۇيەسىن قۇراستىرىپ، ونى ەنەرگەتيكالىق نىسانعا بەيىمدەپ ورناتادى.
بۇعان قوسا تاراپتار عىلىمي زەرتتەۋ جۇرگىزۋ، ءوندىرىستى وزبەكستان اۋماعىنا كوشىرۋ جانە قاجەتتى ينفراقۇرىلىم جاساقتاۋعا ۋاعدالاستى. رەسمي تاشكەنت پەن بۋداپەشت اەس-كە قاجەتتى مامانداردى بىرلەسىپ وقىتۋعا دا نيەتتى.
Uzatom اگەنتتىگىنىڭ ديرەكتورى ازيم احمەدحادجاەۆتىڭ سوزىنشە، ماجارستان قۇرعاق سالقىنداتۋ جۇيەسىن قۇراستىرۋدى 2026 جىلى باستايدى.
ەسكە سالايىق، بۇعان دەيىن وزبەكستان بيلىگى ءىرى اەس سالۋ مۇمكىندىگىن قاراستىرىپ جاتقانىن جازعان ەدىك.
سونىمەن قاتار قازىرگى ۋاقىتتا رەسمي تاشكەنت از قۋاتتى اەس سالۋعا كىرىستى. ارقايسىسىنىڭ قۋاتى 55 مۆت بولاتىن 6 رەاكتور (جالپى قۋاتى — 330 مۆت) دجيزاك وبلىسىنداعى تۋزكان كولىندە بوي كوتەرەدى. اەس-ءتىڭ العاشقى رەاكتورى 2029 جىلدىڭ سوڭىندا ىسكە قوسىلماق. ال ول تولىق قۋاتتا 2033 جىلدان باستاپ جۇمىس ىستەيدى دەپ جوسپارلانعان.
جاقىندا Kazinform اگەنتتىگىنە سۇحبات بەرگەن Uzatom اگەنتتىگىنىڭ ديرەكتورى ازيم احمەدحادجاەۆ ەنەرگەتيكالىق نىساننىڭ قۇنى 2 ملرد دوللاردان اسپايتىنىن ايتتى.
وسىعان ساي، وزبەكستان مەن رەسەي اەس سالۋ كەلىسىمشارتىنىڭ كۇشىنە ەنۋ حاتتاماسىنا قول قويدى.
سونداي-اق اەس سالۋ ءۇشىن حالىقارالىق كونسورتسيۋم قۇرىلادى.
