الماتىدا ديپلومىن كوپشىلىك كوزىنشە «جىرتىپ تاستاعان» جاس تۇلەك بەس تاۋلىككە قاماۋعا الىندى. بۇل تۋرالى قالالىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
پوليتسيا وكىلدەرىنىڭ مالىمەتىنشە، بەينە الەۋمەتتىك جەلىلەردى مونيتورينگتەۋ بارىسىندا انىقتالىپ، تەكسەرۋ جۇرگىزىلگەن.
«تەكسەرۋ بارىسىندا الماتىداعى جەكەمەنشىك كوللەدجدەردىڭ ءبىرىنىڭ تۇلەگى ديپلوم تابىستاۋ راسىمىنەن كەيىن ديپلومنىڭ مۇقاباسىنا ۇقساس زاتتى كوپشىلىك الدىندا جىرتىپ جاتقان ۆيدەونى الەۋمەتتىك جەلىگە جاريالاعانى انىقتالدى. الايدا جۇرگىزىلگەن تەكسەرۋ ناتيجەسىندە تۇپنۇسقا ديپلوم مەن ونىڭ قوسىمشاسىنا، سونداي-اق ءبىلىم بەرۋ ۇيىمى بەرگەن ديپلوم مۇقاباسىنا ەشقانداي زاقىم كەلمەگەنى بەلگىلى بولدى. بەينەجازبادا الدىن الا دايىندالعان ديپلوم مۇقاباسىنىڭ يميتاتسياسى پايدالانىلعان»،– دەلىنگەن حابارلامادا.
تەكسەرۋ قورىتىندىسى بويىنشا جاس جىگىت اكىمشىلىك قۇقىق بۇزۋشىلىق تۋرالى كودەكسىنىڭ 456-2-بابىنىڭ 3-1-بولىگى بويىنشا اكىمشىلىك جاۋاپكەرشىلىككە تارتىلعان. سونداي-اق سوت ونى اكىمشىلىك قۇقىق بۇزۋشىلىق تۋرالى كودەكسىنىڭ 434-بابى 1-بولىگىنە سايكەس ۇساق بۇزاقىلىق جاساعانى ءۇشىن كىنالى دەپ تانىپ، بەس تاۋلىككە اكىمشىلىك قاماۋعا الۋ تۋرالى شەشىم شىعارعان.
