امەريكالىق مۇناي-گاز كومپانياسى Chevron كاسپي قۇبىر كونسورتسيۋمى تەرمينالىنا جاسالعان شابۋىلعا بايلانىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى ريا نوۆوستي اگەنتتىگىنە سىلتەپ.
كاسپي قۇبىرى جەلىسى مۇناي قۇبىرى جۇيەسىنىڭ كوپتەگەن ەلدەردىڭ ەنەرگەتيكالىق قاۋىپسىزدىگى ءۇشىن اسا ماڭىزدى ەكسپورتتىق باعىت ەكەنىن اتاپ ءوتتى.
كومپانيا مالىمدەمەسىندە:
«كاسپي قۇبىر كونسورتسيۋمى – قازاقستاندا وندىرىلەتىن مۇنايدى حالىقارالىق نارىقتارعا جەتكىزەتىن نەگىزگى ەكسپورتتىق مارشرۋت. ونىڭ ۇزدىكسىز جۇمىسى تەك وندىرۋشىلەر ءۇشىن عانا ەمەس، سونىمەن قاتار وسى تاسىمالداۋ جۇيەسىنە ەنەرگەتيكالىق قاۋىپسىزدىك تۇرعىسىنان تاۋەلدى كوپتەگەن ەلدەر ءۇشىن دە شەشۋشى ماڭىزعا يە»، - دەلىنگەن.
29 قاراشا كۇنى كاسپي قۇبىرى جەلىسىنىڭ ءۇش سىرتقى ايلاقتارىنىڭ ءبىرى مۇناي تەرمينالىنا جاسالعان شابۋىل سالدارىنان قاتتى زاقىمداندى. كونسورتسيۋم قىزمەتكەرلەرى مەن مەردىگەرلەر اراسىندا زارداپ شەككەندەر جوق.
قازاقستاننىڭ ەنەرگەتيكا مينيسترلىگى بۇل وقيعاعا بايلانىستى پىكىر ءبىلدىرىپ، ازاماتتىق ماقساتتاعى ماڭىزدى ينفراقۇرىلىم نىساندارىنا جاسالعان مۇنداي شابۋىلداردىڭ جول بەرىلمەيتىنىن ايتتى. سونداي-اق مينيسترلىك ەكسپورتتىق مۇناي كولەمىن بالاما باعىتتارعا قايتا ءبولۋ بويىنشا شۇعىل جوسپار ىسكە قوسىلعانىن حابارلاعان ەدى.
