مادەنيەت جانە اقپارات ءمينيسترى ايدا بالاەۆا باق وكىلدەرىن ءىس-شارالارعا تىركەۋدىڭ جاڭا تارتىبىنە قاتىستى تۇسىنىكتەمە بەردى. بۇل تۋرالى ول Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
«جالپى اتالعان قۇجات جوباسى قولدانىستاعى ەرەجەلەرمەن سالىستىرعاندا اسا كوپ وزگەرمەگەن. مىسالى، اككرەديتتەۋدەن باس تارتۋ نەگىزدەرى تۋرالى ەرەجەلەرگە توقتالساق. بۇل باق-تىڭ جۇمىس ىستەۋىن ۋاقىتشا توقتاتۋ نەمەسە مۇلدەم جابۋ جانە رەسمي رەەستردە تىركەلمەگەنى تۋرالى سوت شەشىمى كۇشىنە ەنگەن جاعدايدا ىسكە اسادى»، - دەپ جازدى ايدا بالاەۆا.
ودان ءارى مينيستر جۋرناليستتەر اراسىندا ەڭ كوپ سۇراق تۋدىرعان جاڭا ەرەجەنىڭ 10-تارماعىنا، اتاپ ايتقاندا باق وكىلدەرى ساقتاۋى ءتيىس تالاپتارعا توقتالدى.
بىرىنشىدەن، كەز كەلگەن جۋرناليست قاي باق اتىنان اككرەديتاتسيادان وتسە، سول رەداكتسياعا عانا اقپاراتتى جيناپ، جاريالاي الادى. الايدا جۋرناليستكە بىردەن بىرنەشە باق اتىنان اككرەديتاتسيا الۋعا ەشكىم تىيىم سالمايدى.
ەكىنشىدەن، بۇل تالاپ بەلگىلى ءبىر وقيعاعا/ىس-شاراعا قاتىستى جۋرناليستەردىڭ جەكە پىكىرلەرى مەن ۇستانىمدارىن الەۋمەتتىك جەلىلەردەگى جەكە پاراقشالارىنا بىلدىرۋگە قاتىسى جوق.
ۇشىنشىدەن، رەگلامەنت ماسەلەسىنە كەلەتىن بولساق، قولدانىستاعى ەرەجەلەردە قازىردىڭ وزىندە ءىس-شاراعا قاتىسۋشىلاردىڭ تاقىرىپتى، ۋاقىت ءتارتىبىن، قوعامدىق ءتارتىپتى ساقتاۋىن جۇرگىزۋشى (ياعني، ءىس-شارا مودەراتورى) قامتاماسىز ەتەتىنى قاراستىرىلعان.
اقش پەن ەۋروپالىق وداقتىڭ جانە حالىقارالىق ۇيىمداردىڭ حالىقارالىق تاجىريبەسى كورسەتكەندەي، بەلگىلەنگەن ەرەجەلەردى، سونداي-اق زاڭنامانى بۇزعان جاعدايدا جۋرناليست ءىس-شارالارعا قاتىسۋ قۇقىعىنان جانە اككرەديتاتسيادان ايىرىلادى. مىسالى، ەۋروپارلامەنتتەگى باق قىزمەتىن رەتتەيتىن ەرەجەدە تۇسىرىلىمگە رۇقسات ەتىلگەن ارنايى ورىندار قاتاڭ تۇردە بەلگىلەنگەن.
تورتىنشىدەن، ەرەجەدە ءاربىر مەملەكەتتىك ورگاننىڭ نەمەسە ۇيىمنىڭ بەلگىلى ءبىر ءىس-شارانىڭ رەگلامەنتىن ءوزى بەكىتەتىندىگى كورسەتىلگەن. بۇل رەتتە مينيسترلىك ۋاكىلەتتى ورگان رەتىندە اقپاراتقا قولجەتىمدىلىك قاعيداتتارىن جانە جۋرناليستەردىڭ ەرەكشە مارتەبەسىن ساقتاۋ ماسەلەلەرى بويىنشا اتالعان رەگلامەنتتى ازىرلەۋ بويىنشا ءتيىستى ۇسىنىستارىن جىبەرەتىن بولادى.
بەسىنشىدەن، ەرەكشە ماڭىزدى مەملەكەتتىك وبەكتىلەرگە كىرۋ جانە سول مەكەمەلەردەگى رەجيمدەردى ۇستانۋ دا قولدانىستاعى زاڭنامانى ساقتاۋ مەن قاۋىپسىزدىكتىڭ اينىماس بولىگى.
«قورىتىندىلاي كەلە، اقپاراتقا قولجەتىمدىلىكتى قامتاماسىز ەتۋ مەن جۋرناليستەردىڭ مارتەبەسىن ارتتىرۋ – ارقاشان مينيسترلىك قىزمەتىنىڭ باستى باسىمدىعى ەكەنىن تاعى دا جەتكىزگىم كەلەدى»، - دەيدى ايدا بالاەۆا.
ەسكە سالا كەتەيىك، مەملەكەت باسشىسى 19 ماۋسىمدا «ماسس-مەديا تۋرالى» زاڭعا قول قويدى.
