قازاقستاننىڭ حالىق ءارتىسى، كورنەكتى ونەر قايراتكەرى ريحانگۇل ماحپيروۆا 79 جاسىندا ومىردەن ءوتتى، دەپ حابارلايدى "ادىرنا" ۇلتتىق پورتالى.
ول 1946 جىلدىڭ 1 تامىزىندا الماتى وبلىسى ەڭبەكشىقازاق اۋدانىنىڭ شەلەك اۋىلىندا دۇنيەگە كەلگەن.
شىعارماشىلىق قىزمەتىن ساكەن سەيفۋللين اتىنداعى قاراعاندى وبلىستىق قازاق دراما تەاترىندا باستاعان. 1971–1977 جىلدارى اباي اتىنداعى جامبىل وبلىستىق تەاتردا ەڭبەك ەتتى.
1977 جىلدان باستاپ قۇدىس قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىندا ەڭبەك ەتتى. ۇزاق جىلدار بويعى ساحنالىق قىزمەتىندە ول قازاق تەاتر ونەرىنىڭ التىن قورىنا ەنگەن سان الۋان كوركەم، ايشىقتى ءارى كورەرمەن جادىندا ساقتالعان بەينەلەردى سومدادى.
مادەنيەت سالاسىنا سىڭىرگەن وراسان ەڭبەگى ءۇشىن ريحانگۇل ماحپيروۆا «قازاقستان رەسپۋبليكاسىنىڭ ەڭبەك سىڭىرگەن ءارتىسى» جانە «قازاقستاننىڭ حالىق ءارتىسى» قۇرمەتتى اتاقتارىمەن ماراپاتتالعان.
قازاقستان رەسپۋبليكاسىنىڭ مادەنيەت جانە اقپارات مينيسترلىگى مارقۇمنىڭ وتباسى مەن تۋعان-تۋىستارىنا، جاقىندارى مەن ونەرسۇيەر قاۋىمعا قايعىرا كوڭىل ايتتى.
"ەل تانىمال ونەر قايراتكەرىنەن ايىرىلدى. مارقۇمنىڭ جارقىن بەينەسى جۇرەكتەردە ماڭگى ساقتالادى", – دەلىنگەن ۆەدومستۆو حابارلاماسىندا.
