رەسەي – قازاقستان شەكاراسىندا بىرنەشە ايدان بەرى قالىپتاسقان جۇك كولىكتەرىنىڭ ۇزىن-سونار كەزەگى زاڭسىز تاۋار اينالىمىمەن كۇرەسۋدىڭ جاڭا شارالارىنا بايلانىستى. بۇل تۋرالى رەسەي پرەزيدەنتى ۆلاديمير پۋتين قىرعىزستانعا رەسمي ساپارىنىڭ قورىتىندىسى بويىنشا بەرگەن ءباسپاسوز مالىمدەمەسىندە ايتتى.
ءپۋتيننىڭ مالىمدەۋىنشە، ونىڭ تاپسىرماسىمەن ەۋرازيالىق ەكونوميكالىق وداق (ەاەو) شەڭبەرىندەگى كەدەن ورگاندارى شەكارا ماڭىندا كەزدەيسوق تەكسەرۋلەر جۇرگىزۋدى باستاعان. ناتيجەسىندە كوپتەگەن جۇك كولىكتەرىنىڭ رەسەي–قازاقستان شەكاراسىن مۇلدەم قۇجاتسىز كەسىپ وتەتىندىگى انىقتالعان.
«تەكسەرۋلەر باستالعاندا ەشقانداي قۇجات جوق ەكەنى بەلگىلى بولدى. بۇل – قارا يمپورت. ءبىزدىڭ كەدەن اۋماعىمىزعا تاۋارلار باقىلاۋسىز كىرىپ جاتىر. رەسەي بيۋدجەتىنەن ميللياردتاعان رۋبل جوعالىپ وتىر»، – دەدى پۋتين.
ونىڭ ايتۋىنشا، ەاەو اياسىندا ورتاق كەدەندىك كەڭىستىك پەن تاۋارلاردىڭ ەركىن قوزعالىسى بولعانىمەن، ءاربىر جۇك كولىگى بەلگىلى ءبىر قۇجاتتار پاكەتىمەن جۇرۋگە مىندەتتى. بۇل قۇجاتتار جۇكتىڭ قۇرامى، كەدەندىك قۇنى، كەدەندىك تولەمدەر جانە ققس تولەۋگە قاتىستى اقپاراتتى قامتۋى ءتيىس.
پۋتين قازاقستان پرەزيدەنتى قاسىم-جومارت توقاەۆپەن بۇل ماسەلەنى تالقىلاعانىن اتاپ ءوتتى.
«توقاەۆ ءبارىن دۇرىس ءتۇسىندى، ەشقانداي سۇراق تا، پروبلەما دا جوق»، – دەدى ول.
ەكى مەملەكەت شەكارادا جينالىپ تۇرعان جۇك كولىكتەرىن بىرتىندەپ وتكىزۋگە كەلىسكەن. پرەزيدەنتتىڭ ايتۋىنشا، كولىكتەردى شەكارادان وتكىزۋ «جاسىل دالىزگە» ۇقساس رەجيمدە جۇزەگە اسادى – جۇرگىزۋشىلەر ەڭ تومەنگى تولەم ەنگىزىپ، كولىكتەر كەزەكسىز وتەدى. ال 2026 جىلدان باستاپ تاڭدامالى تەكسەرۋلەر كەزىندە بارلىق قاجەتتى قۇجاتتار تالاپ ەتىلەتىن بولادى. قۇجاتسىز تاۋار تاسىمالداعانداردىڭ كولىگى تاركىلەنۋى مۇمكىن.
پۋتين شەكاراداعى جاعدايدى بيىلعى جىلدىڭ سوڭىنا دەيىن تولىق شەشۋگە بولادى دەپ ەسەپتەيدى.
ايتا كەتسەك، شۇك كولىكتەرىنىڭ شەكارادا جينالۋى قىركۇيەك ايىنان بەرى بايقالىپ كەلەدى. رەسمي ورگاندار شەكارادان وتۋگە قاتىستى كەدەرگىلەر جوق دەپ مالىمدەگەنىمەن، قازاقستاندىق اقپارات قۇرالدارى جۇرگىزۋشىلەر رەسەي تاراپىنداعى كۇشەيتىلگەن تەكسەرىستەردەن قاۋىپتەنىپ، قازاقستان اۋماعىندا توقتاپ تۇرعانىن حابارلاعان. رەسەي كەدەن قىزمەتى قازان ايىندا شەكارا ماڭىندا كولىكتەردى كەزدەيسوق تەكسەرەتىن ءموبيلدى توپتار جۇمىس ىستەپ جاتقانىن راستاعان.
