قاسكەلەڭ شاتقالىندا جەكە مەنشىك جەر ۋچاسكەسىنەن مەملەكەتتىك ورمان قورى اۋماعىنا تاراعان ءورت وقشاۋلاندى، دەپ حابارلايدى “ادىرنا”.
بۇل تۋرالى ىلە-الاتاۋى مەملەكەتتىك ۇلتتىق تابيعي پاركى حابارلادى.
ۇلتتىق پاركتىڭ مالىمەتىنشە، ءورت 28 قازاندا اقساي فيليالىنا قاراستى قاسكەلەڭ ورمانشىلىعى اۋماعىندا تىركەلگەن. جالىن ۇلتتىق پارك اۋماعىندا ورناتىلعان ورمان ورتتەرىن ەرتە انىقتاۋ جۇيەسى ارقىلى ساعات 13:14-تە انىقتالعان.
تاۋلى جەر بەدەرى مەن ءورت وشاعىنا ارنايى تەحنيكانىڭ جەتۋى قيىنداعاندىقتان، ءورت ءسوندىرۋ جۇمىستارى ساعات 14:00-دە باستالعان.
ءورتتى سوندىرۋگە 43 ادام مەن 10 بىرلىك تەحنيكا جۇمىلدىرىلدى. مامانداردىڭ جەدەل ارەكەتىنىڭ ناتيجەسىندە جالىن سول كۇنى ساعات 16:50-دە وقشاۋلاندى.
ۇلتتىق پارك وكىلدەرىنىڭ ايتۋىنشا، ءورتتى ەرتە انىقتاۋ جۇيەسى مەن ءتيىستى قىزمەتتەردىڭ ۇيلەسىمدى جۇمىسى جالىننىڭ ودان ءارى تارالۋىنا جول بەرمەۋگە مۇمكىندىك بەرگەن.
