جەتىسۋ ستانتسياسى تەمىرجول ۆوكزالىنىڭ جاڭعىرتۋ جۇمىستارى اياقتالدى

الماتى وبلىسىنداعى جەتىسۋ ستانتسياسى تەمىرجول ۆوكزالىنىڭ رەكونسترۋكتسياسى اياقتالدى. جاڭارتىلعان نىسان جولاۋشىلار ءۇشىن كەڭ, زاماناۋي ءارى جايلى بولىپ, قاۋىپسىزدىك پەن قولجەتىمدىلىك تالاپتارىنا تولىق ساي كەلەدى.

1959 جىلى سالىنعان تەمىرجول ۆوكزالى تولىق جاڭعىرتىلدى. قايتا جاڭارتۋ ناتيجەسىندە عيماراتتىڭ جالپى اۋماعى ەكى ەسەگە جۋىق، ياعني 135,7 شارشى مەتردەن 258,3 شارشى مەترگە دەيىن ۇلعايدى. ءبىر قاباتتى ۆوكزال عيماراتى جولاۋشىلار مەن تەمىرجول سالاسى قىزمەتكەرلەرىنە قولايلى جاعداي جاساۋ ءۇشىن زاماناۋي ينفراقۇرىلىممەن جابدىقتالدى.

قايتا جاڭارتۋ بارىسىندا شاتىردى مونتاجداۋ, عيماراتتىڭ سىرتقى جانە ىشكى ارلەۋى, كارىز, سۋ، جىلۋ جانە ەلەكترمەن جابدىقتاۋدىڭ سىرتقى جانە ىشكى ينجەنەرلىك جەلىلەرىنىڭ جۇمىسى ورىندالدى. سونداي-اق, پەرروندى قايتا جاڭارتۋ, ىرگەلەس اۋماقتى اباتتاندىرۋ جانە زاماناۋي جيھازداردى ورناتۋ جۇمىستارى جۇرگىزىلدى.

جەتىسۋ ستانتسياسىنىڭ تەمىرجول ۆوكزالى 3-ساناتتاعى ۆوكزالعا جاتادى. ستانتسيا ارقىلى كۇن سايىن الماتى، التىنكول, سارىوزەك جانە قاپشاعاي باعىتتارىنا قاتىنايتىن ءتورت جولاۋشىلار پويىزى وتەدى.

ەسكە سالا كەتەيىك, ۆوكزالدى جاڭعىرتۋ جۇمىستارى مەملەكەت باسشىسىنىڭ تاپسىرماسى بويىنشا ەلىمىزدەگى 124 تەمىر جول ۆوكزالىن رەكونسترۋكتسيالاۋ جانە جاڭعىرتۋ جونىندەگى اۋقىمدى باعدارلاما اياسىندا جۇزەگە اسىرىلدى. الماتى وبلىسىندا بۇل باعدارلاما ءتورت تەمىرجول ۆوكزالىن قامتيدى: قوناەۆ, شامالعان, جەتىسۋ جانە قازىبەك بەك (ۇزىناعاش).

ماۋسىم ايىندا جاڭعىرتۋدان وتكەن قوناەۆ ستانتسياسىنىڭ تەمىرجول ۆوكزالى پايدالانۋعا بەرىلدى. 1978 جىلى سالىنعان ۆوكزال تولىق جاڭارتىلىپ, زاماناۋي تالاپتارعا سايكەستەندىرىلدى.