تارازدا اسكەري انت قابىلداۋ ءراسىمى كەزىندە جاڭادان كەلگەن ساربازدارعا جاۋىنگەرلىك دايىندىق كورسەتپەك بولعان كونتراكتتىق اسكەري قىزمەتكەر بوتەلكەنى باسىنا ۇرىپ سىندىرماق بولىپ، اۋىر جاراقات الدى، دەپ حابارلايدى "ادىرنا" ۇلتتىق پورتالى Atameken Business ارناسىنا سىلتەمە جاساپ.
جەلىدە تاراعان ۆيدەودا جاقسىلىق مولداقۇلوۆتىڭ بوتەلكەنى باسىنا سوققاننان كەيىن بىردەن ەسىنەن تانىپ قالعانى كورىنەدى. ول بەس جىلدان بەرى كەلىسىمشارت نەگىزىندە بارلاۋ روتاسىندا قىزمەت ەتىپ كەلگەن جانە مۇنداي كورسەتىلىمدەرگە ءجيى قاتىسقان.
جاس جىگىت بىردەن اۋرۋحاناعا جەتكىزىلگەنىمەن، ونىڭ وڭ كوزىن ساقتاپ قالۋ مۇمكىن بولماعان. بۇل تۋرالى ونىڭ اناسى مالىمدەدى.
"بالامنىڭ ءجۇزىن كورىپ شوشىپ كەتتىم. دارىگەرلەر ونىڭ كوزى كورمەي قالعانىن ايتتى. مەن ولاردىڭ كوزىن الىپ قالۋىن ءوتىندىم", — دەدى ساربازدىڭ اناسى گۇلزيرا بايقونىسوۆا.
دارىگەرلەردىڭ ايتۋىنشا، سارباز اۋرۋحاناعا اۋىر جاعدايدا تۇسكەن. سوققى ونىڭ كورۋ قابىلەتىمەن قاتار جۇيكە جۇيەسىنە دە زاقىم كەلتىرگەن. وڭ كوزدىڭ كورۋ قابىلەتى نولگە تۇسكەن، بىراق ەكىنشى كوزدى ساقتاپ قالۋعا مۇمكىندىك بار.
"وپەراتسيانىڭ ماقساتى — كوزدىڭ قابىعىن قالپىنا كەلتىرۋ جانە تىگۋ. جاراقات العان كوزدىڭ ەكىنشى كوزگە اسەرىن بولدىرماۋ كەرەك. الداعى ۋاقىتتا كولەمدى ەم جۇرگىزىلەدى", — دەدى جامبىل وبلىستىق وفتالمولوگيالىق ورتالىعى باس دارىگەرىنىڭ ورىنباسارى جانسايا سىدىقوۆا.
اسكەري بولىمدە قىزمەتتەستەر ءالى ەس جيا الماي وتىر. كومانديردىڭ ايتۋىنشا، مولداقۇلوۆ تاجىريبەلى جاۋىنگەر بولعان. ال وقيعا ابايسىزدا ورىن العان.
"ونىڭ مۇگەدەكتىك الۋ-الماۋىن ايتۋعا ءالى ەرتە. مەديتسينالىق ساراپتاما ءالى جاسالعان جوق، ەم جالعاسىپ جاتىر. ءبىز اسكەري قىزمەتكەرگە بارلىق كومەك كورسەتەمىز", — دەدى №91/678 اسكەري ءبولىمى كومانديرى باۋىرجان ەسالى.
وقيعاعا بايلانىستى تەرگەۋ باستالدى. اسكەري قىزمەتكەر جۇمىسىنان شەتتەتىلمەگەن، بىراق ونى بارلاۋ روتاسىنان جەڭىل قىزمەتكە اۋىستىرۋ جوسپارلانىپ وتىر.
