تارازدا ەڭبەك دەمالىسىنان شىققان ءبىر توپ مۇعالىم شۋ شىعاردى. №28 مەكتەپتىڭ ۇستازدارى تامىز ايىندا ىستەگەن ەڭبەگىمىزدىڭ اقىسىن تولىق الا المايتىن بولدىق دەپ اشۋلى. بۇل تۋرالى كتك تەلەارناسى مالىمدەدى، دەپ حابارلايدى “ادىرنا” ۇلتتىق پورتالى.
تەلەارنا مالىمەتىنشە، ءبىلىم ءبولىمى وقۋ وشاعىندا جوندەۋ ءجۇرىپ جاتقاندىقتان، مۇعالىمدەرگە تەك جالاقى تولەنەدى دەپ وتىر.
ال ولاردىڭ ساناتىنا تيەسىلى قوسىمشا اقى بەرىلمەيدى. الايدا ۇستازدار قاۋىمى بۇل تۋرالى مەكتەپ ديرەكتورى ەشكىمگە ەشتەڭە ەسكەرتپەگەنىن ايتادى. ولار وسى اي باستالعالى كوشە كەزىپ، سىنىپتاعى وقۋشى سانىن تولتىرۋ ءۇشىن ءبىلىم ورداسىنا بالا جيناۋمەن بولعان.
بىرىنەن باستاپ جۇمىسقا شىقتىق. بىراق بىزگە قازىر ايلىعىمىزدى تەك جالاقى رەتىندە تولەيمىز دەپ جاتىر. ءبىز وعان قارسىمىز. نەگە؟ ويتكەنى بارىندە يپوتەكا بار. بارىندە نەسيە بار. مەكتەپ جاقىنداپ قالدى. ءبارى بالا-شاعاسىن كيىندىرۋ كەرەك. باسقا №62 مەكتەپتىڭ ىشىندە جوندەۋ بولىپ جاتقان مەكتەپتەن عانا ۇنەمدەپ، ايلىقتىڭ جالاقىسىن بەرەيىن دەپ جاتىر، - دەيدى مۇعالىم دينارا مويلاۋوۆا.مەكتەپتە كەش باستالعان قۇرىلىس تا جاڭا وقۋ جىلىنا دەيىن اياقتالماۋى مۇمكىن. وسى ايدا بىتپەيتىن بولعان جاعدايدا بالالار باسقا نىساندا ءبىلىم الۋعا ءماجبۇر بولادى. ال 11 كۇن بويى ءۇي-ءۇيدى ارالاعان اعارتۋشىلاردىڭ اقىسىز قىزمەت ەتۋىنە كىنالى ادام تابىلمادى. مەكتەپ ديرەكتورى دا، ءبىلىم ءبولىمى دە بۇل تۋرالى ءمىز باقپاعان.
كۇردەلى جۇمىس باستالاردىڭ الدىندا ديرەكتورلارمەن تۇسىندىرمە جۇرگىزىلگەن. بۇل كىسىلەر تۇسىندىرمە جۇرگىزۋ كەرەك بولاتىن. ال جۇرگىزدى، جۇرگىزبەدى، مەن ونى ايتا المايمىن. بۇل باسشىسىنىڭ قۇزىرىندا. ول كىسىلەر جۇرگىزۋ كەرەك ەدى. جاڭا وقۋ جىلىنا دەيىن 20 كۇن قالدى. قۇرىلىس ءبىتىپ ۇلگەرە مە؟ مەن قازىر ناقتى ايتا المايمىن. بىتىرۋگە بارلىق جاقتان اتسالىسىپ جاتىرمىز، - دەيدى تاراز ءبىلىم ءبولىمى باسشىسىنىڭ ورىنباسارى گۇلبانۋ مالىبەكقىزى.
