تالعار قالاسىنىڭ تۇرعىنى ەلميرا كۋلاكوۆانىڭ الەۋمەتتىك جەلىدە تاراعان ۆيدەولارى قوعام نازارىن وزىنە اۋداردى. جازبالاردا ايەل قازاق ۇلتىنا قاتىستى سىن پىكىرلەر ايتىپ، كەيبىر تۇستاردا قورلايتىن سوزدەر قولدانعان. بۇل ۆيدەولار جەلى قولدانۋشىلارى اراسىندا رەزونانس تۋدىرىپ، قۇقىقتىق باعا بەرۋ تۋرالى تالاپتار كوبەيدى.
ءبىر ۆيدەودا ەلميرا كۋلاكوۆا كەي قازاقتاردىڭ ورىس تىلىندە قويىلعان سۇراقتاردى ادەيى تۇسىنبەي قالاتىن سياقتى كورىنەتىنىن ايتىپ، ءوز نارازىلىعىن بىلدىرەدى.
«وسى قازاقتارعا نە بولعان؟ نەگە سونشا جامان بولدىڭدار؟ بايقايتىنىم، كەي قازاقتارعا ورىسشا سۇراق قوياسىڭ، ولار ادەيى جاۋاپ بەرمەي قويادى. ولار "تۇسىنبەيمىن" دەپ وينايدى نەمەسە اقىماق سەكىلدى كەيىپ تانىتادى. نەگە وسىنداي بولدىڭدار، نەگە وزدەرىڭدى بۇلاي ۇستايسىڭدار؟ نەگە سونشا ناقۇرىس بولدىڭدار؟» – دەدى ايەل ۆيدەودا.
باسقا ۆيدەودا ول بەلگىسىز ەر اداممەن سويلەسىپ، قازاقستانداعى ورىستارعا قىسىم بار ەكەنىن العا تارتادى. ەر ادام مۇنداي قىسىم جوق ەكەنىن ايتقان كەزدە كۋلاكوۆا:
«بالالارىم مەكتەپ اۆتوبۋستارىندا تىنىش جۇرە المايدى. بۇل ناعىز رۋسسوفوبيا ەمەي، نەمەنە؟» — دەپ جاۋاپ بەرەدى.
الايدا ول بۇل وقيعاعا ناقتى كىمنىڭ قاتىسى بارىن بىلمەيتىنىن ايتادى:
«وسى جاعدايدى ۇيىمداستىرعان ادامدى تابۋعا تىرىسىپ جاتىرمىن. وسىنى ويلاپ تاپقان اقىماقتى ىزدەپ جاتىرمىن»، — دەيدى ول.
ەلميرا كۋلاكوۆانىڭ كەيىنگى ۆيدەولارىندا ءتىل ماسەلەسى كەڭىرەك قوزعالادى. ول قازاق ءتىلىنىڭ قازىرگى دەڭگەيىن جەتكىلىكسىز دەپ سانايتىنىن جانە ورىس تىلىنە ەكىنشى مەملەكەتتىك ءتىل مارتەبەسىن قايتارۋ يدەياسىن قولدايتىنىن بىلدىرەدى:
«قازاق ءتىلى ءالى دە تولىق جەتىلمەگەن. سوزدىك قورىن بايىتۋ، تەحنيكالىق جانە مەديتسينالىق ءتىل قالىپتاستىرۋ قاجەت»، – دەيدى ول.
ونىڭ ايتۋىنشا، تولىققاندى قازاق تىلىندە ءبىلىم الۋ مۇمكىندىكتەرى شەكتەۋلى.
سونداي-اق، كۋلاكوۆا ەلدە كەي ۇيىمدار تاراپىنان ورىس تىلىنەن باس تارتۋ يدەياسى ناسيحاتتالۋدا دەپ سانايدى.
جەلى قولدانۋشىلارىنىڭ ءبىر بولىگى ونىڭ سوزدەرىن ۇلتتىق ارازدىق تۋدىرۋعا باعىتتالعان دەپ باعالاپ، قۇقىق قورعاۋ ورگاندارىن شارا قابىلداۋعا شاقىردى. كەي قولدانۋشىلار ونى تۋعان ەلىنە وپاسىزدىق جاسادى دەپ سىنعا الدى.
باسقالارى بۇل مالىمدەمەلەر تۇلعانىڭ جەكە ەموتسياسىنا جانە جەكە تاجىريبەسىنە نەگىزدەلگەن بولۋى مۇمكىن ەكەنىن ايتىپ، ۆيدەولاردا جۇيەلى ديسكريميناتسيا دالەلدەنبەگەنىن اتاپ ءوتتى.
الماتى وبلىسى پد جاعدايعا بايلانىستى پىكىر ءبىلدىردى.
«باس پروكۋراتۋرادان رەسمي جاۋاپ كۇتىپ وتىرمىز. جاۋاپ كەلگەن جاعدايدا ءىس قوزعاپ، قاجەت راسىمدەر جۇرگىزىلەدى»،— دەپ حابارلادى.
قوسىمشا اقپارات كەيىن بەرىلەتىنى ايتىلدى.
