«Silk Way Star» حالىقارالىق جوباسىنىڭ گراند-فينالى مارەسىنە جەتتى. مۋزىكالىق دودانىڭ جەڭىمپازى موڭعوليا ەلىنىڭ نامىسىن قورعاعان ميشەل دجوزەف بولدى، دەپ حابارلايدى "ادىرنا".
جەڭىمپازعا جۇلدەنى ديماش قۇدايبەرگەن تابىستادى.
جوبا فينالىندا مەملەكەتتىك كەڭەسشىسى ەرلان قارين پرەزيدەنت قاسىم-جومارت توقاەۆتىڭ قۇتتىقتاۋ ءسوزىن وقىدى.
«Silk Way Star» – ازيا ەلدەرىنىڭ رۋحاني ىقپالداستىعىن نىعايتىپ، حالىقتارىمىزدىڭ دوستىعىن بەكەمدەي تۇسەتىن بىرەگەي باستاما.
"Silk Way Star" – مادەني ديپلوماتيانىڭ ايقىن كورىنىسى، ۇلتتارىمىزدىڭ سالت-ءداستۇرى مەن شىعارماشىلىعىن پاش ەتەتىن تاماشا جوبا. وسىنداي اۋقىمدى ءىس-شارالار ىنتىماعىمىزدى كۇشەيتەدى، ورتاق قۇندىلىقتارىمىزدى جان-جاقتى دارىپتەيدى. China Media Group مەدياكورپوراتسياسىنا شىنايى ريزاشىلىعىمدى بىلدىرەمىن.
ازەربايجان، ارمەنيا، گرۋزيا، قازاقستان، قىتاي، قىرعىزستان، مالايزيا، موڭعوليا، تاجىكستان، تۇرىكمەنستان، وزبەكستان، وڭتۇستىك كورەيا ەلدەرىنەن كەلگەن دارىن يەلەرى وتە جوعارى دەڭگەيدە ونەر كورسەتىپ، ميلليونداعان كورەرمەننىڭ ىستىق ىقىلاسىنا بولەنۋدە. بارشاڭىزعا العىس ايتامىن. الداعى ۋاقىتتا دا بيىك بەلەستەردى باعىندىرا بەرەسىزدەر دەپ سەنەمىن! سىزدەرگە اماندىق جانە ساتتىلىك تىلەيمىن»، – دەلىنگەن پرەزيدەنت قۇتتىقتاۋىندا.
"Silk Way Star" جوباسىنىڭ جەڭىمپازىنا جۇلدەنى ديماش قۇدايبەرگەن تابىستادى. ول ءاربىر قاتىسۋشى وسى جوبا اياسىندا ءوز ەلىنىڭ مادەنيەتىن، رۋحانياتىن، ەڭ ادەمى تۇستارىن، سازدى اۋەنىن كۇللى الەمگە جوعارى دەڭگەيدە كورسەتكەنىن اتاپ ءوتتى.
موڭعوليالىق ءانشى دە وزىنە قولداۋ بىلدىرگەن كوپشىلىككە العىسىن جاۋدىردى.
«ونىڭ جەڭىسى 12 ەلدىڭ تالانتتارى مەن مادەنيەتتەرىن تابىستى بىرىكتىرگەن جوبانىڭ جارقىن قورىتىندىسىنا اينالىپ، جاڭا «جىبەك جولى» بويىنداعى دوستىق بايلانىستاردى نىعايتتى»، – دەلىنگەن حابارلامادا.
فينالدا جەتى ءانشى ونەر كورسەتتى. ولار: يازمين ازيز (مالايزيا), مادينابونۋ ادىلوۆا (وزبەكستان), ميشەل دجوزەف (موڭعوليا), اۆتانديل ابەسلاميدزە (گرۋزيا), ALEM (قازاقستان), سارو گەۆورگيان (ارمەنيا) جانە چجان حە سيۋان (قىتاي).
ونلاين داۋىس بەرۋ ناتيجەسىندە قازاقستاندىق ءانشى Alem 80% ۇپاي جياناپ ەكىنشى ورىنعا تۇراقتادى. ول گراند-فينالدا ءوزىنىڭ اۆتورلىق تۋىندىسى «كوكتەم» ءانىن ورىندادى.
"Silk Way Star" جوباسىنىڭ جەڭىمپازى ارالاس داۋىس بەرۋ جۇيەسى ارقىلى انىقتالادى:
50% قازىلار القاسىنىڭ شەشىمى، 50% كورەرمەندەردىڭ ونلاين-داۋىس بەرۋى.
داۋىس بەرۋ ءتارتىبى «ەۆروۆيدەنيە» سياقتى حالىقارالىق جوبالاردىڭ تاجىريبەسىنە سۇيەنە وتىرىپ جاسالعان.
