بەرىك ابدىعاليۇلى «Abay Live» پودكاستىندا اۋدان اكىمدەرىن سايلاۋ تۋرالى پىكىرىن ءبىلدىردى.
ابدىعاليۇلىنىڭ ايتۋىنشا، ءوزى قىزمەت ەتكەن جىلدارى اۋىل اقساقالدارى «نەگە اكىمدى ءوزىمىز تاڭدامايمىز؟» دەگەن ساۋالدى ءجيى كوتەرگەن. «قازىر ناعىز دەموكراتيانىڭ اۋىلدان باستالىپ جاتقانى قۋانتادى. سوڭعى جىلدارى ەلىمىزدە ۇلكەن دەموكراتيالىق پروتسەسستەر ءجۇرىپ جاتىر»، – دەدى ول.
پودكاست جۇرگىزۋشىسى «ەگەر اكىم ءبىر جىلدان كەيىن قىزمەتتەن كەتسە، قايتادان سايلاۋ وتكىزىلە مە؟» دەگەن سۇراق قويعان كەزدە، ابدىعاليۇلى: ء«يا، قالىپتاسقان ءتارتىپ سولاي، ناۋقاندى قايتا باستاۋعا تۋرا كەلەدى»، – دەپ جاۋاپ بەردى.
سۇحبات بارىسىندا بەرىك ابدىعاليۇلى قاراجات ماسەلەسىن دە كوتەردى. ونىڭ ايتۋىنشا، سوڭعى 2–3 جىلدا 45 اۋدان اكىمى سايلانىپتى. سوڭعى ءبىر جىلدا عانا حالىق جاڭا 6–7 اۋدان اكىمىن سايلاعان. تەك ءبىر جىلدا اۋدان اكىمدەرىنىڭ سايلاۋىنا 1 ميلليارد تەڭگە جۇمسالعان ەكەن.
كەزىندە ۇلىتاۋ وبلىسىنىڭ العاشقى اكىمى بولعان بەرىك ابدىعاليۇلىنىڭ ايتۋىنشا، اۋدان اكىمدەرىنىڭ سايلاۋىن ءماسليحاتتاردىڭ جۇرگىزگەنى ابزال. جۇرگىزۋشىنىڭ سوڭعى قويعان سۇراقتارىنىڭ بىرىنە بەرىك ابدىعاليۇلى ەڭ باستىسى – اۋدان اكىمدەرىنىڭ جۇمىسى ءتيىمدى جانە ناتيجەلى بولۋى كەرەك دەپ جاۋاپ بەردى. اۋداندارداعى ءماسليحات – بۇل ءوزىن-ءوزى باسقارۋ جۇيەسى، جۇرگىزىلىپ جاتقان جۇمىستى حالىق تىكەلەي جانە وزدەرىنىڭ ماسليحاتتاعى وكىلدەرى ارقىلى باقىلاۋ كەرەك، دەپ قورىتىندىلادى ءوز ءسوزىن بەلگىلى قوعام قايراتكەرى.
