پرەزيدەنت توقاەۆ قاڭتار وقيعاسى كەزىندە كومەككە جۇگىنگەن ۇجىمدىق قاۋىپسىزدىك شارت ۇيىمىنىڭ ارەكەتىنە (ۇقشۇ) باعا بەردى، دەپ جازادى “ادىرنا. بۇل تۋرالى ول “ەگەمەن قازاقستان” گازەتىنە بەرگەن سۇحباتىندا ايتتى.
مەملەكەت باسشىسى حالىق اۋزىندا جۇرگەن جاڭساق پىكىرگە ناقتى جاۋاپ بەردى. ول بۇل شەشىمىمەن رەسەيدەن ەمەس، ۇقشۇ-دان كومەك سۇراعانىن باسا ايتتى:
”ايماقتاردا جاپپاي تارتىپسىزدىك بەلەڭ الىپ، جەرگىلىكتى بيلىك دارمەنسىزدىك تانىتقاندا، قاۋىپسىزدىك كەڭەسى ۇجىمدىق قاۋىپسىزدىك تۋرالى شارت ۇيىمىنا جۇگىنۋ تۋرالى شەشىم قابىلدادى. قازاقستان ونىڭ بىتىمگەرلىك كۇشتەرىن تۇراقتىلىق پەن قاۋىپسىزدىكتى قامتاماسىز ەتۋ ءۇشىن عانا قىسقا مەرزىمگە ەنگىزۋدى سۇرادى. بۇل جەردە مىنا جايتقا باسا ءمان بەرۋ كەرەك. ءبىز بۇل قۇرىلىمنىڭ مۇشەسى رەتىندە رەسەيگە ەمەس، ۇجىمدىق قاۋىپسىزدىك تۋرالى شارت ۇيىمىنا جۇگىندىك” دەدى ول.
“سول كەزدە وسى ۇيىمنىڭ توراعاسى ارمەنيا ەدى. بيىل ۇقشۇ-عا قازاقستان توراعالىق ەتەدى. قۇرىلىم جاساعى، شىن مانىندە، بىتىمگەرلىك ءرول اتقارىپ، قاسىرەتتى كۇندەردە ەلدى جايلاعان جۇگەنسىزدىكتى توقتاتۋعا سەپتىگىن تيگىزدى. ۇيىمعا مۇشە-مەملەكەتتەرمەن كەلىسىلگەندەي، بۇل بىتىمگەرلىك كۇشتەر الدىن الا ەشقانداي تالاپ قويماستان، ونىڭ ۇستىنە مەرزىمىنەن بۇرىن قازاقستاننان سىرتقا شىعارىلدى” دەپ باعالادى ۇيىمنىڭ ءىس-ارەكەتىن.
سونىمەن قاتار، كورشى ەلدەردىڭ دە ىقپالىن اتاي كەتتى ول:
“ۇقشۇ بىتىمگەرلىك كۇشتەرى لاڭكەستىككە قارسى وپەراتسيالارعا قاتىسقان جوق، بىردە-ءبىر وق اتقان جوق. ارمەنيا جاساعى «اقساي» نان زاۋىتىن جانە «الماتى سۋ» مەكەمەسىن، بەلارۋس جاساعى جەتىگەندەگى اەرودرومدى، تاجىكستان مەن قىرعىز رەسپۋبليكاسىنىڭ اسكەري قىزمەتشىلەرى الماتى قالاسىنىڭ ءبىرىنشى جانە ەكىنشى جىلۋ ەلەكتر ورتالىقتارىن، رەسەي جاساعى ءۇشىنشى جىلۋ ەلەكتر ورتالىعى مەن تەلەكوممۋنيكاتسيا نىساندارىن كۇزەتتى. وسى ماڭىزدى نىساندارعا لاڭكەستىك شابۋىلدار جاسالۋى مۇمكىن دەگەن قاۋىپ بولدى. سوندىقتان بىتىمگەرلىك كۇشتەر سولاردى كۇزەتۋگە جىبەرىلدى. ەڭ باستىسى، سول ارقىلى ءوز كۇشتەرىمىزدى لاڭكەستىككە قارسى وپەراتسياعا جۇمىلدىرۋعا مۇمكىندىك تۋدى” دەدى پرەزيدەنت.
