پرەزيدەنت قاسىم-جومارت توقاەۆ پەن ارمەنيانىڭ پرەمەر-ءمينيسترى نيكول پاشينيان باق وكىلدەرىنە ارناپ بريفينگ وتكىزدى. بۇل تۋرالى اقوردا جازدى، دەپ حابارلايدى “ادىرنا”.
“مەن ازەربايجان باسشىسىنا سانكتسيالاردى الىپ تاستاپ، ءوز ەلى ارقىلى ەكىجاقتى تىكەلەي ساۋدا جۇرگىزۋ تۋرالى شەشىم قابىلداعانى ءۇشىن ريزاشىلىعىمدى ءبىلدىردىم. مىسالى، بيىلعى قاراشا ايىندا ازەربايجان اۋماعى ارقىلى ارمەنياعا قازاقستان بيدايىنىڭ العاشقى 1 مىڭ تونناسى جەتكىزىلدى. بۇل باستامانىڭ ساياسي جانە ەكونوميكالىق ءمان-ماڭىزى ايرىقشا. ءبىز ارمەنياعا جوعارى ساپالى استىق ونىمدەرىن جانە باسقا دا تاۋارلاردى تۇراقتى تۇردە جەتكىزۋگە دايىنبىز وسى باعىتتاعى جۇمىسقا كۇش-جىگەرىمىزدى جۇمىلدىرۋعا ۋاعدالاستىق. ەكى ەل اراسىندا تىكەلەي اۋە رەيسىن اشۋ جانە اۋەمەن جۇك تاسىمالداۋ جۇمىسىن رەتكە كەلتىرۋ – ماڭىزدى مىندەتتىڭ ءبىرى”، – دەدى قاسىم-جومارت توقاەۆ.
