پرەزيدەنت قاسىم-جومارت توقاەۆ قازاقستاندىقتاردى «تاريحي جاراقات العان ۇلت» پسيحولوگياسىنان ءبىرجولا ارىلۋعا ۇندەدى، دەپ حابارلايدى "ادىرنا" ۇلتتىق پورتالى.
مەملەكەت باسشىسى بۇل پىكىرىن قىزىلوردادا وتكەن ۇلتتىق قۇرىلتاي وتىرىسىندا ايتتى.
پرەزيدەنتتىڭ سوزىنشە، وتكەننىڭ قاسىرەتىنە بايلانىپ، بارلىق قيىندىقتى وزگە حالىقتاردان كورۋ – كەشەۋمەن ءومىر ءسۇرۋدىڭ كورىنىسى.
ء«بىز “تاريحي جاراقات العان” ۇلت پسيحولوگياسىنان ءبىرجولا ارىلۋىمىز كەرەك. بۇكىل الەم وزگەرىپ جاتىر، بىزگە دە وزگەرەتىن ۋاقىت كەلدى. ءبىز – بولاشاعى جارقىن، جولى اشىق جاس مەملەكەتپىز. سوندىقتان تەك العا قاراي ءجۇرۋىمىز قاجەت»، – دەدى توقاەۆ.
پرەزيدەنت قازىرگى جاھاندىق وزگەرىستەر جاعدايىندا قازاقستانعا باتىل، ءداستۇرلى ەمەس جانە يننوۆاتسيالىق شەشىمدەر قاجەت ەكەنىن اتاپ ءوتتى. ونىڭ ايتۋىنشا، ۇلكەن ءارى تۇبەگەيلى وزگەرىستەر ۋاقىتى كەلدى.
«ۇندەۋدى ەڭ الدىمەن مەملەكەتتىك قىزمەتشىلەرگە، كاسىپكەرلەرگە جانە عالىمدارعا ارنايمىن. ەلىمىز جاڭا تاريحي شىندىقتا لايىقتى ورىن الۋعا ءتيىس»، – دەدى ول.
