Qazaqstanda epidemiologiialyq jaǧdai jyl saiyn küz-qys ailarynda uşyǧatyny belgılı. Biyl da JRVİ men tūmau boiynşa ösım baiqalyp otyr. Būl turaly Densaulyq saqtau bırınşı vise-ministrı Timur Sūltanǧaziev pıkır bıldırdı, dep habarlaidy «Adyrna» tılşısı.
Onyŋ aituynşa, biyl aua raiynyŋ jyly boluyna bailanysty JRVİ mausymy bırneşe aptaǧa erterek bastalǧan.
«Osy jyly aua raiy jyly bolyp tūr. Sol sebeptı JRVİ mausymy biyl bırneşe aptaǧa erterek bastaldy. Alaida ötken jylmen salystyrǧanda jalpy auruşaŋdyq tömen. Ötken jyly 1 400 000 jaǧdai tırkelgen bolsa, biyl būl körsetkış 20 paiyzǧa azaiyp otyr. Densaulyq saqtau ministrlıgı öz tarapynan qajettı şaralardy qabyldap, jaǧdaidy tolyq baqylauda ūstap otyr»,- dedı ol.
Vise-ministrdıŋ mälımetınşe, biyl 2 100 000 adam tūmauǧa qarsy vaksina alǧan. Vaksina eŋ aldymen balalarǧa, jüktı äielderge, sozylmaly aurulary bar nauqastarǧa jäne medisina qyzmetkerlerıne salynǧan.
Sondai-aq medisinalyq ūiymdarda qosymşa filtrlık kabinetter aşylǧan.
«Qazır respublika boiynşa emhanalar men auruhanalarda 1 800-ge juyq filtr kabinetı jūmys ıstep tūr»,- dedı vedomstvo ökılı.
Timur Sūltanǧaziev elde Gonkong tūmauynyŋ da anyqtalyp jatqanyn aitty.
«Gonkong tūmauy — kädımgı mausymdyq tūmau. 1968 jyldan berı belgılı. Qazırgı uaqytta şamamen 590 jaǧdai PTR arqyly anyqtaldy. Būl — H3N2 tipındegı A tūmauy, būrynnan ainalymda jürgen virus»,-dedı ol.
Soŋǧy künderı keibır därılerdıŋ kömektespei jatqany jäne tapşylyǧy turaly şaǧymdarǧa da toqtaldy.
«Därı-därmekpen qamtamasyz etu boiynşa bız ırı farmasevtikalyq kompaniialarmen jäne distribiutorlarmen kün saiyn jūmys jürgızıp jatyrmyz. Keşe ǧana olarmen keŋes öttı. Olardyŋ aituynşa, qoimalarda virusqa qarsy preparattar, steroidty emes qabynuǧa qarsy därıler, parasetamol, ibuprofen jäne basqa da qajettı preparattar tolyq kölemde bar. Bız kelısım boiynşa därıhanalardy qajettı mölşerde därılermen qamtamasyz etu mındetın aldyq»,-dedı Sūltanǧaziev.
