ۇلتتىق امال مەرەكەسى حالىقارالىق دەڭگەيدە تويلانىپ جاتىر. كيىز تۋىرلىقتى، قارعا تامىرلى قازاقتىڭ كيەلى وشاعى - وتپان تاۋدا "بىرلىك وتى" تۇتاندى، دەپ سۇيىنشىلەيدى "ادىرنا" ۇلتتىق پورتالى.
وتپان تاۋدا تۇتانعان الاۋ جايلى "Mangystau Media" حابارلادى.
- ماڭعىستاۋدا امال مەرەكەسى حالىقارالىق دەڭگەيدە تويلانۋدا. ماڭعىستاۋ حالقىنىڭ كوپشىلىگى جىل سايىن امال مەيرامىن وتپان تاۋدا قارسى الادى. اداي اتا ۇرپاقتارى ءار جىلدا ءبىر-بىرىنە ەستافەتا جالعاپ، كەزەگىمەن ۇيىمداستىراتىن ۇلگىلى ۇردىسكە اينالدى.
سول ءۇردىس بويىنشا بۇگىن وتپانتاۋدا “بىرلىك وتى” جاعىلدى. ەكى كۇنگە جالعاسقان شارانىڭ قىزىعى ەرتەڭ، 14 ناۋرىزدا باستالادى، - دەپ جازدى اگەنتتىك.
امال مەرەكەسىن قازاق حالقى ەرەكشە سيپاتتا قارسى الادى. اقىن سابىر اداي كورىسۋ كۇنىنىڭ قۇندىلىعى جايلى:
«تۋىسقا تۋىس ەرگەن كۇن،كەربەزدەپ كەۋدە كەرگەن كۇن.بىرلىگىن كورىپ حالىقتىڭ،وتپان تاۋ ءتورىن بەرگەن كۇن»، - دەپ تاتۋلىق تۋىن بيىكتەتكەن امال مەرەكەسىنىڭ تاعىلىمىن جىرعا قوسقان.
امال مەرەكەسىنىڭ ماڭىزىن ەسەلەپ، ءمانىن اشقان حالىقارالىق دەڭگەيدەگى يگى باستاما اياسىندا تەاترلانعان قويىلىم، كونتسەرتتىك باعدارلاما، كوكپار شابۋ، الامان بايگە، وزگە دە شارالاردى تاماشالاي الاسىزدار.
"ادىرنا" ۇلتتىق پورتالى
