قازاقستانننىڭ ەكس-پرەزيدەنتى نۇرسۇلتان نازارباەۆتىڭ كەنجە قىزى ءاليا نازارباەۆا قازاقستاندىق كاسىپكەرلەر نۇرلان بيمۋرزين مەن مەدعات قاليەۆكە قارسى سوتتا جەڭىلىپ قالدى. بۇل تۋرالى قازتاگ جاريالادى، دەپ حابارلايدى “ادىرنا” ۇلتتىق پورتالى.
نۇرلان بيمۋرزيننىڭ ايتۋىنشا، نازارباەۆا ادۆوكاتتارى ارقىلى بيمۋرزين مەن قاليەۆتىڭ ۇستىنەن جالا جابۋ تۋرالى شاعىم ءتۇسىرىپ، ولاردىڭ جاۋاپقا تارتىلۋىن تالاپ ەتتى. الايدا وتكەن اپتادا سوت قۇقىق بۇزۋشىلىق بەلگىلەرىنىڭ بولماۋىنا بايلانىستى ءىستى توقتاتقان.
اقپان ايىندا مەدعات قاليەۆ پەن نۇرلان بيمۋرزين باس پروكۋراتۋراعا ءاليا نازارباەۆانى رەيدەرلىك شابۋىل جاسادى دەپ ايىپتاپ ارىز جازعان.
«ءبىزدى قولداعان بارلىق جاناشىر ازاماتتارعا العىسىمدى بىلدىرگىم كەلەدى. اتى ۇلكەن بولسا دا، زاڭدى دا ءادىل شەشىم شىعارعان سوت جۇيەسىنە ەرەكشە العىسىمدى بىلدىرەمىن. ءتورت اي بويى ءبىر قۇزىرلى ورگاننان ەكىنشى ورگانعا جولدانعان ارىزىمىز ءادىل ناتيجەگە اكەلمەيدى دەپ ويلادىق. الايدا، قازاقستان رەسپۋبليكاسىنىڭ جوعارعى سوتى وتكەننىڭ جادىگەرلەرىن ەمەس، زاڭدى باسشىلىققا الاتىنىن دالەلدەدى. قازاقستان رەسپۋبليكاسى ىشكى ىستەر مينيسترلىگى ولارعا پروتسەسسۋالدىق شەشىم قابىلداۋ ءۇشىن جولدانعان ءوتىنىشىمىزدى قارايدى دەپ ۇمىتتەنەمىز»، – دەدى بيمۋرزين.
ەسكە سالا كەتەيىك، 2024 جىلى 28 اقپاندا بيمۋرزين ءوزىنىڭ سەرىكتەسى قاليەۆپەن بىرگە نازارباەۆا مەن روگوۆانىڭ رەيدەرلىك شابۋىلىنىڭ قۇربانى بولعانىن ايتقان بولاتىن. كەيىن مامىر ايىنداولار حالىقارالىق ورگاندارعا شاعىمداناتىنىن ايتتى.
