ماڭعىستاۋ وبلىسىنىڭ شارۋالارى قۋاڭشىلىقتان ءتىرى قالعان مالىن ساقتاپ قالۋ ءۇشىن جانتالاسىپ جاتىر دەپ حابارلايدى «ەۆرازيا» تەلەارناسى.
وڭىردە جاعداي شىن مانىندە اسا قيىن. ءتىرى قالعان مالعا جەم-ءشوپ جوق، سۋ پروبلەماسى ءالى دە ساقتالۋدا. ۇكىمەت بولگەن 2 ملرد تەڭگە تۇككە جەتپەدى دەيدى شارۋالار. قاراجاتتىڭ جارتىسى بۇگىندە يگەرىلگەن. بىراق، ناقتى كومەك بولماي جاتىر دەيدى ولار.
جەرگىلىكتى تۇرعىن ساعات قوسوۆتىڭ ايتۋىنشا، جۇتتان ءتىرى قالعان مالدىڭ ءوزى ءولۋدىڭ الدىندا تۇر. ابدەن السىرەپ، ورنىنان دا تۇرا المايدى ەكەن. ال، ۇكىمەتتىڭ «وبلىستا 1 مىڭنان استام مال قىرىلدى» دەگەن ستاتيستيكاسى وتىرىك دەيدى ول. بۇگىندە يەن دالادا ارام قاتقان جىلقىلاردىڭ ولەكسلەرى ءالى جاتىر.
«ولار وتتاي بەرەدى. كەمى 5-6 مىڭ مال قىرىلدى»، - دەيدى ساعات قوسوۆ.
ال، نۇربولات تەمىرباەۆ بولسا كەشەگى جازدا 27 باس جىلقىسىنان ايىرىلعان. كۇن قاتتى ىسىعان كەزدە ونىڭ جيناعان ءشوبى تۇگەل ورتەنىپ كەتىپتى. ساتىپ الايىن دەسە باعا ۇشىپ تۇر.
«ۇكىمەتتەن العان اقشاما نەبارى 150 قاپ جەم الدىم. كۇنىگە 2 قابىن بەرەمىن مالعا. اي سوڭىنا دەيىن نە بولارىن بىلمەيمىن. قاۋىن-قاربىز بەرەتىن شىعارمىن»، - دەيدى ول.
شارۋالار جازدان امان شىققان مال الداعى قىستا تۇگەل قىرىلىپ قالا ما دەپ قورقادى. ويتكەنى دەنەسىندە مايى جوق، وزدىگىمەن استاۋعا بارىپ سۋ ىشە المايتىن جىلقىلار قار تۇسكەندە ءۇسىپ ءولۋى دە عاجاپ ەمەس.
