تۇركىستان وبلىسىنىڭ جەتىساي اۋدانىندا ءورت وقيعاسى سالدارىنان ون ەكى ادام قازا تاپتى، دەپ حابارلايدى "ادىرنا" ۇلتتىق پورتالى.
تۇركىستان وبلىسى تجد مالىمەتىنشە، 18 قاراشا كۇنى تاڭەرتەڭ جەتىساي اۋدانىنىڭ العاباس اۋىلىندا ەكى قاباتتى جەكە تۇرعىن ۇيدەن ءورت شىققانى تۋرالى حابار تۇسكەن. ءورت سوندىرۋشىلەر كەلگەن كەزدە ءۇي تولىقتاي ورتكە ورانعان.
«بارلاۋ جانە ءورتتى ءسوندىرۋ كەزىندە ۇيدەن ەس-ءتۇسسىز جاتقان ءۇش ادام ەۆاكۋاتسيالانىپ، جەدەل مەديتسينالىق جاردەمگە تاپسىرىلدى. ىشتەن توعىز بالانى قوسا العاندا، بارلىعى 12 ادام ءولى تابىلدى»، – دەلىنگەن ۆەدومستۆو حابارلاماسىندا.
كورشىلەردىڭ ايتۋىنشا، ءورت بولعان ءتۇنى ۇيدە قوناقتار بولعان. سەبەبى الدىڭعى كۇنى ءۇي يەلەرى وتباسىلىق شارا ۇيىمداستىرعان.
ءورت 360 شارشى مەتر اۋماقتا تولىعىمەن ءسوندىرىلدى. وقيعا ورنىندا جەدەل قىزمەت وكىلدەرى جۇمىس ىستەپ جاتىر. تەرگەۋ باستالدى، ءورتتىڭ شىعۋ سەبەبى انىقتالىپ جاتىر.
