ايگىلى ءانشى ەرمەك سەركەباەۆ پەن تانىمال كينورەجيسسەر ابدوللا قارساقباەۆتىڭ 100 جىلدىعى يۋنەسكو-نىڭ اتاۋلى كۇندەر كۇنتىزبەسىنە ەنگىزىلدى. بۇل تۋرالى مەملەكەتتىك كەڭەسشى ەرلان قارين مالىمدەدى، دەپ حابارلايدى «ادىرنا» ءتىلشىسى.
ايتۋىنشا، بۇل شەشىم قازاق مادەنيەتىنىڭ الەمدىك مۇراعا قوسقان ۇلەسىنىڭ جوعارى باعالانعانىن كورسەتەدى.
«يۋنەسكو باس كونفەرەنتسياسىنىڭ 43-سەسسياسىندا قازاقستان تاراپىنان بەرىلگەن بىرنەشە ۇسىنىس قولداۋ تاپتى. ايگىلى وپەرا ءانشىسى ەرمەك سەركەباەۆ پەن كورنەكتى كينورەجيسسەر ابدوللا قارساقباەۆتىڭ 100 جىلدىق مەرەيتويلارى 2026-2027 جىلدارى حالىقارالىق ۇيىم اياسىندا اتالىپ وتەتىن اتاۋلى كۇندەر كۇنتىزبەسىنە ەنگىزىلدى. بۇل – ۇلتتىق ءارى الەمدىك مادەنيەتتىڭ دامۋىنا زور ۇلەس قوسقان قازاقستاندىق قايراتكەرلەردىڭ حالىقارالىق دەڭگەيدە لايىقتى مويىندالۋىنىڭ ءبىر بەلگىسى»، - دەپ جازدى قارين.
يۋنەسكو-نىڭ اتاۋلى كۇندەر كۇنتىزبەسى — ۇيىم تاراپىنان قولداۋ تاپقان جانە حالىقارالىق دەڭگەيدە ۇيىمداستىرىلاتىن اتاۋلى كۇندەر مەن مەرەيتويلاردىڭ، ماڭىزدى وقيعالاردىڭ رەسمي ءتىزىمى.
يۋنەسكو دەرەگىنشە، ۇيىم 1956 جىلدان بەرى 1234 اتاۋلى كۇندى اتاپ وتۋگە اتسالىسقان. سونىڭ 31-ءى قازاقستاننىڭ باستاماسىمەن كۇنتىزبەگە ەنگەن. بۇعان دەيىن اباي قۇنانبايۇلىنىڭ 150 جىلدىق, شىمكەنت قالاسىنىڭ 2200 جىلدىق، الماتى قالاسىنىڭ 1000 جىلدىق، مۇحتار اۋەزوۆتىڭ، قانىش ساتباەۆتىڭ، ءسابيت مۇقانوۆتىڭ 100 جىلدىق مەرەيتويلارى جانە باسقا دا اتاۋلى كۇندەر يۋنەسكو قولداۋىمەن حالىقارالىق دەڭگەيدە تويلانعان ەدى.
