ىستانبۇل باس پروكۋراتۋراسى قىزمەتىنەن شەتتەتىلگەن قالا مەرى ەكرەم يماموعلۋعا قاتىستى تەرگەۋدى اياقتادى، دەپ حابارلايدى «ادىرنا» ءتىلشىسى.
پروكۋراتۋرا شەنەۋنىككە 828 جىل، 2 ايلىق تۇرمە، ياعني 2352 جىلعا دەيىن باس بوستاندىعىنان ايىرۋ جازاسىن سۇراپ وتىر.
ايىپتاۋ اكتىسى 3900 بەتتەن تۇرادى. ءىس بويىنشا 402 كۇدىكتى بار، ولاردىڭ 102-ءسى قاماۋدا وتىر. يماموعلۋعا قىلمىستىق توپ قۇرۋ، 12 رەت جەمقورلىق جاساۋ، جەتى رەت اقشانى جىلىستاتۋ جانە الاياقتىق دەرەكتەرى بويىنشا ايىپ تاعىلعان. سونىمەن قاتار ول وزگە فيگۋرانتتارعا قاتىستى كوپتەگەن سىبايلاس جەمقورلىق ىستەرىندە دە اتالادى.
پروكۋراتۋرانىڭ مالىمەتىنشە، سوڭعى ون جىل ىشىندە جاسالعان قىلمىستاردىڭ جالپى سوماسى 160 ميلليارد تۇرىك ليراسىنا باعالانىپ وتىر.
ايتا كەتەيىك، يماموعلۋ 2025 جىلدىڭ 19 ناۋرىزىندا پوليتسيانىڭ انتيكوررۋپتسيالىق تەرگەۋى اياسىندا ۇستالعان بولاتىن. كەيىن تۇركيا ءىىم ونى ۋاقىتشا قىزمەتىنەن شەتتەتىپ، قاماۋعا الىنعانىن راستادى.
