21 جىل بۇرىن تۇرمەدەن قاشقان سولتۇستىك قازاقستان وبلىسىنىڭ تۋماسى گرۋزيادا ۇستالدى، دەپ حابارلايدى «ادىرنا» ءتىلشىسى.
نيكولاي پاۆليۋك 1999 جىلدان بەرى حالىقارالىق ىزدەۋدە بولعان. ول وسى ۋاقىت ىشىندە بىرنەشە ەلدە مەكەن ەتىپ، ءتىپتى سولتۇستىك قازاقستاندا باسقا بىرەۋدىڭ اتىمەن ءومىر سۇرگەن.
نيكولاي العاش 20 جاسىندا توناۋ ىسىنە قاتىسقان. سەرىكتەستەرىمەن بىرگە روستوۆ تۇرعىندارىنىڭ ءبىرىنىڭ پاتەرىنە باسا كوكتەپ كىرىپ، ولاردان 100 ميلليون رۋبل، جازعى كوتتەدج جانە كاماز كولىگىن تالاپ ەتكەن. ەر ادامدى ۇرىپ-سوعىپ، قۇندى زاتتارىن ۇرلاعان.
ول 1995 جىلى سوتتالىپ، سەگىز جىلعا باس بوستاندىعىنان ايىرىلادى. 1999 جىلدىڭ شىلدەسىندە پاۆليۋك كراسنودار ولكەسىنىڭ حادىجەنسك قالاسىنداعى يك-9 كولونياسىنان ەكى سەرىكتەسىمەن بىرگە قاشىپ كەتكەن. كەيبىر مالىمەتتەر بويىنشا، قىلمىسكەرلەر وزدەرىمەن بىرگە 300 مىڭ دوللار الىپ كەتكەن.
التى ايدان كەيىن ەكى قاشقىن ادىگەيادا ۇستالىپ، پوليتسيا قىزمەتكەرلەرىن اتىپ ولتىرەدى. سوت ولارعا ءومىر بويى باس بوستاندىعىنان ايىرۋ جازاسىن تاعايىندايدى.
ءۇشىنشى قاشىپ كەتكەن قىلمىسكەر نيكولاي پاۆليۋك ءالى دە ىزدەۋدە بولادى. ەر ادام جازادان قۇتىلۋ ءۇشىن رەسەي اۋماعىنان شىعىپ كەتەدى.
ول بىرنەشە جىل ەستونيادا جالعان تولقۇجاتپەن ءومىر سۇرگەن. ال 2004 جىلى ەل ەۋروپالىق وداقتىڭ قۇرامىنا كىرگەن كەزدە گەرمانياعا اناسىنىڭ جانىنا كەتەدى.
2010 جىلى پاۆليۋك ميحايل يۆانوۆيچ ۋتكەۆيچ دەگەن جالعان اتپەن قازاقستان ازاماتتىعىن الادى. وسى تولقۇجاتپەن ەر ادام ءبىراز ۋاقىت پەتروپاۆلدا تۇرعان.
كەيىن ۋتكەۆيچ-پاۆليۋك ۇيلەنىپ، ۇلدى بولادى. بىرنەشە جىلدان كەيىن ەرلى-زايىپتىلار اجىراسىپ، قازاقستاندىق ايەلى پاۆليۋك-ۋتكەۆيچتەن اليمەنت ءوندىرىپ الۋ ءۇشىن سوتقا جۇگىنەدى. وسى ۋاقىتتا قىلمىسكەر گرۋزياعا كوشىپ، وندا بەس جىلعا جۋىق جاسىرىنىپ جۇرگەن.
پاۆليۋك قاشقاننان 21 جىل وتكەن سوڭ فقق قىزمەتكەرلەرى تۇتقىندى ۇستادى. قازىر ونى رەسەيگە ەكستراديتسيالاۋ ماسەلەسى شەشىلۋدە.
«ادىرنا» ۇلتتىق پورتالى
