استانادا ليفتتە 5 جاستاعى بالاعا پىشاقپەن شابۋىل جاساعان ءجاسوسپىرىمنىڭ اناسى جاۋاپقا تارتىلدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ايەل اكىمشىلىك قۇقىق بۇزۋشىلىق تۋرالى كودەكسىنىڭ 127-بابى (كامەلەتكە تولماعان ادامدى تاربيەلەۋ جانە وعان ءبىلىم بەرۋ، ونىڭ قۇقىقتارىن نەمەسە مۇددەلەرىن قورعاۋ جونىندەگى مىندەتتەردى، قاۋىپسىزدىگىن قامتاماسىز ەتۋ جونىندەگى شارالاردى ورىنداماۋ) بويىنشا جاۋاپقا تارتىلدى.
ول 20 ايلىق ەسەپتىك كورسەتكىشپەن 78 640 تەڭگە ايىپپۇل تولەدى. ءجاسوسپىرىمنىڭ ءىس-ارەكەتى ءالى تەرگەلىپ جاتىر.
ەسكە سالايىق، استانادا تۇرعىن ۇيلەردىڭ بىرىندەگى ليفتتە ءجاسوسپىرىم 5 جاسار بالانىڭ بەتىنە پىشاق جاراقاتىن سالعان. بالا دەرەۋ اۋرۋحاناعا جەتكىزىلدى. وعان وتا جاسالدى. قازىرگى تاڭدا جاعدايى جاقسى. كۇدىكتىنى پوليتسيا ۇستاپ اكەتتى.
