اباي وبلىسىنىڭ اكىمى بەرىك ءۋالي وبلىس اكىمدىگى تاراپىنان 400 ميلليون تەڭگەگە جيھاز ساتىپ الۋ تۋرالى اقپاراتقا قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
بۇعان دەيىن بۇقارالىق اقپارات قۇرالدارىندا وبلىس اكىمدىگى بيۋدجەت تاپشىلىعىنا قاراماستان، 400 ميلليون تەڭگەگە جيھاز الۋدى جوسپارلاپ وتىرعانى تۋرالى حابار تاراعان ەدى.
بەرىك ءۋاليدىڭ ايتۋىنشا، ول بۇل سوما جايلى العاش رەت باق ارقىلى بىلگەن جانە بىردەن ساتىپ الۋ پروتسەسىن توقتاتقان.
«ارىپتەس جۋرناليستەر اۋديتورياسىن كەڭەيتۋ ماقساتىندا اقپاراتتى تەكسەرمەي جاريالاعان. سونىڭ سالدارىنان مەن وزىمە 400 ميلليون تەڭگەگە جيھاز ساتىپ الىپ جاتىرمىن دەگەن قاۋەسەت تارادى»، — دەدى اكىم.
ونىڭ سوزىنشە، جيھاز مەملەكەتتىك قىزمەتكەرلەردىڭ جۇمىس كابينەتتەرىنە ارنالعان. بارلىعى 671 قىزمەتكەرگە ۇستەل، كومپيۋتەر ۇستەلى، ورىندىق، شكاف سياقتى قاراپايىم كەڭسە جيھازى قاجەت بولعان.
«2024 جىلى جيھاز ساتىپ الۋ بويىنشا بايقاۋ جەتى رەت وتكىزىلگەنىمەن، جەڭىمپاز انىقتالماعان. مەن قىزمەتكە كەلگەن كەزدە بۇل پروتسەسس ءجۇرىپ جاتقان ەدى، بىراق مەن ونى دەرەۋ توقتاتتىم»، — دەدى بەرىك ءۋالي.
سونىمەن قاتار اكىم ەندى ءار باسقارما مەن ءبولىمنىڭ ساتىپ الۋ وتىنىمدەرىن بولەك جاريالاۋدى تاپسىرعانىن ايتتى.
«مەنىڭ كابينەتىمە ەشقانداي جاڭا ۇستەل نەمەسە ورىندىق الىنعان جوق. بۇل جيھازدار وبلىس قۇرىلعاننان بەرى ءوز ۇيىندەگى ۇستەل مەن ورىندىقتارىن اكەلىپ جۇرگەن قىزمەتكەرلەر ءۇشىن قاجەت»، — دەپ اتاپ ءوتتى ول.
اكىمنىڭ ايتۋىنشا، مەملەكەتتىك قىزمەتشىلەرگە قولايلى ەڭبەك جاعدايىن جاساۋ — مىندەتتى شارا.
ء«بىز ءبارىبىر بۇل كونكۋرستى جاريالايمىز. ويتكەنى، قىزمەتكەرلەردىڭ كۇندەلىكتى جۇمىسىنا جاعداي جاساۋ قاجەت. بۇل جيھازدار 671 قىزمەتكەردىڭ كۇندەلىكتى پايدالانۋىنا ارنالعان»، — دەدى بەرىك ءۋالي.
