سەمەي قالاسىندا جاڭا دوستىق ءۇيى سالىنادى. وبلىس اكىمى بەرىك ءۋاليدىڭ توراعالىعىمەن قازاقستان حالقى اسسامبلەياسىنىڭ 30 جىلدىعىنا ارنالعان كەڭەيتىلگەن كەڭەس ءوتتى. جيىنعا وڭىردەگى ەتنومادەني بىرلەستىكتەردىڭ، قوعامدىق ينستيتۋتتاردىڭ وكىلدەرى قاتىستى.
بۇگىندە وبلىستا 5 دوستىق ءۇيى مەن 46 ەتنومادەني بىرلەستىك جۇمىس ىستەيدى. جىل باسىنان بەرى قوعامدىق كەلىسىم مەن بىرلىكتى نىعايتۋعا باعىتتالعان 250-دەن استام ءىس-شارا ۇيىمداستىرىلعان. كەڭەستە ءسوز العان وبلىس اكىمى قازاقستان حالقى اسسامبلەياسىنىڭ ەلىمىزدىڭ بىرەگەيلىگىن ايقىندايتىن، ازاماتتىق تۇتاستىعىن ارتتىراتىن، ەتنوسارالىق كەلىسىمدى ناقتى ىسپەن جۇزەگە اسىراتىن ماڭىزدى قوعامدىق ينستيتۋت ەكەنىن اتاپ ءوتتى.
«مەملەكەت باسشىسى قاسىم-جومارت كەمەلۇلى توقاەۆتىڭ قوعامدىق-ساياسي رەفورمالارىنىڭ ناتيجەسىندە بۇل ماڭىزدى ينستيتۋتتىڭ قىزمەتىنە تىڭ سەرپىن، جاڭا مازمۇن بەرىلىپ كەلەدى. قازاقستان حالقى اسسامبلەياسىنىڭ ءحححىى سەسسياسىندا پرەزيدەنتىمىز: «ىنتىماعى بەكەم جۇرتتىڭ بولاشاعى باياندى بولادى. ەل بىرلىگىن نىعايتۋ جانە وتانىمىزدى وركەندەتۋ – قاسيەتتى پارىز»، – دەپ ناقتى مىندەت قويدى. بۇل – بارشامىز ءۇشىن ورتاق تاريحي جاۋاپكەرشىلىك. دانا حالقىمىزدا «ىنتىماقتى ەلگە باق قونار» دەگەن اتالى ءسوز بار. بۇل تۇرعىدان العاندا «اسسامبلەيا» – سەنىم مەن سىيلاستىقتىڭ الاڭى، تاتۋلىق پەن تۇراقتىلىقتىڭ تىرەگى. ەتنوستاردىڭ مادەنيەتىن، ءتىلىن، سالت-ءداستۇرىن قۇرمەتتەي وتىرىپ، ءبارىمىزدى بىرىكتىرەتىن – ءبىر مۇددە مەن ورتاق بولاشاق. وتانىمىزدىڭ ىرگەسى بەرىك، شاڭىراعى قاشاندا بيىك بولسىن! قازاقستان حالقى اسسامبلەياسىنىڭ 30 جىلدىق مەرەيلى مەرەكەسى قۇتتى بولسىن!» دەدى ايماق باسشىسى.
وبلىس اكىمى جيىن بارىسىندا ابايدىڭ 180 جىلدىعىنا وراي مەملەكەت باسشىسىنىڭ قولداۋىمەن «ابايعا قۇرمەت» رەسپۋبليكالىق اكتسياسى باستالعانىن ايتتى. يگى باستاما اياسىندا ەلىمىزدىڭ بارلىق وبلىستارى وڭىرىمىزگە تارتۋ جاساماق. ايماق باسشىسى ماڭعىستاۋ وبلىسى سەمەي قالاسىنا جاڭا دوستىق ءۇيىن سالىپ بەرەتىنىن جەتكىزدى.
«بۇل – شىن مانىندە ەلىمىزدىڭ ىشكى بىرلىگىن، ىنتىماعى جاراسقان ەلىمىزدىڭ بىرتۇتاستىعىن كورسەتەدى. وسىنداي قۋانىشتى جاڭالىق ءۇشىن ءبىز پرەزيدەنتىمىزگە، ۇكىمەتكە جانە ماڭعىستاۋ وبلىسىنىڭ اكىمدىگىنە العىس ايتامىز» دەدى وبلىس اكىمى.
كەڭەس اياسىندا ەتنومادەني بىرلەستىك، قوعامدىق ينستيتۋت وكىلدەرى، ءدىني قىزمەتكەرلەر، دوستىق ۇيلەرىنىڭ ديرەكتورلارى، ءماسليحات دەپۋتاتتارى مەن ەڭبەك ارداگەرلەرى «قازاقستان حالقى اسسامبلەياسىنا 30 جىل» مەرەكەلىك مەدالىمەن ماراپاتتالدى.
