شىلدە ايىندا اباي وبلىسىندا العاش رەت رەسپۋبليكالىق ASK CAMP جاستار فورۋمى ءوتتى.
فورۋمدى قر مادەنيەت جانە اقپارات مينيسترلىگى مەن اباي وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ قولداۋىمەن «قازاقستان ستۋدەنتتەر اليانسى» رەسپۋبليكالىق جاستار قوزعالىسى ۇيىمداستىردى.
فورۋمعا ەلىمىزدىڭ بارلىق وڭىرلەرىنەن 300-گە جۋىق بەلسەندى ستۋدەنتتەر، ۆولونتەرلەر مەن جاس كوشباسشىلار قاتىستى. فورماتى جاعىنان ەرەكشە بۇل شارا ءبىلىم بەرۋ الاڭى عانا ەمەس، سونىمەن قاتار دامۋدىڭ، موتيۆاتسيا مەن ەركىن پىكىر الماسۋدىڭ كەڭىستىگىنە اينالدى. نەگىزگى ماقسات — جاستاردىڭ ازاماتتىق ساناسىن نىعايتۋ، پاتريوتتىق قۇندىلىقتاردى دارىپتەۋ جانە بەلسەندى ومىرلىك ۇستانىمدى قالىپتاستىرۋ بولدى.
لاگەر ستيلىندە وتكەن، ءۇش كۇنگە سوزىلعان فورۋم باعدارلاماسى ءتۇرلى پايدالى سەسسيالار مەن ترەنينگتەرگە، موتيۆاتسيالىق كەزدەسۋلەرگە جانە قوعامدىق ماڭىزى بار باستامالارعا تولى بولدى. جاستار ءداستۇرلى ASK Cup فۋتبول تۋرنيرىنە، ەكولوگيالىق اكتسيالارعا، پراكتيكالىق جاتتىعۋلار مەن كوماندالىق ويىندارعا قاتىستى. فورۋم كۇندەرى مازمۇندى ءارى ءماندى ءوتتى: «ەلىم-اي» دەمالىس ورنىنداعى سالتاناتتى اشىلۋدان باستاپ، جيدەبايداعى «تازالىق جارشىسى» ەكو-اكتسياسى جانە ماراپاتتاۋ راسىمىمەن اياقتالعان جابىلۋ سالتاناتىنا دەيىن.
فورۋم اياسىندا مەملەكەتتىك باسقارۋ، ءبىلىم بەرۋ جانە ازاماتتىق قوعام سالاسىندا ەڭبەك ەتىپ جۇرگەن تانىمال تۇلعالارمەن اشىق ديالوگ الاڭدارى ۇيىمداستىرىلدى. سپيكەرلەر قاتارىندا:
• تاستەمىر اقۇلان – قر مادەنيەت جانە اقپارات مينيسترلىگى، جاستار جانە وتباسى ىستەرى كوميتەتى باسقارماسىنىڭ باسشىسى;
• ولجاس تۇسىپبەكۇلى بەيسەنباەۆ – اباي وبلىسى جاستار ساياساتى باسقارماسىنىڭ باسشىسى م.ا.;
• ايرات بازەنوۆيچ – Alikhan Bokeikhan University پرورەكتورى;
• باقداۋلەت بولاتۇلى – استانا قالاسى قوعامدىق كەڭەسى جانىنداعى جاستار ءىسى جونىندەگى كوميسسيا توراعاسى;
• ەلزيرا اۋەسحانوۆنا – «ازاماتتىق اليانس» زتب پرەزيدەنتى، بالا قۇقىقتارى جونىندەگى وڭىرلىك وكىل.
ولار جاستارمەن ءوز تاجىريبەلەرىمەن ءبولىسىپ، مەملەكەتتىك قىزمەت، ءبىلىم بەرۋ جانە ازاماتتىق بەلسەندىلىك تۋرالى ماڭىزدى ويلارىمەن ءبولىستى. كەزدەسۋلەر جاستاردى ەل ومىرىنە بەلسەندى ارالاسۋعا ىنتالاندىرىپ، جاڭا يدەيالار مەن موتيۆاتسيا بەردى.
ASK CAMP فورۋمى «Jas Power» جوباسى اياسىندا ۇيىمداستىرىلدى. جوبا ازاماتتىق-پاتريوتتىق تاربيە مەن جاس كوشباسشىلاردىڭ الەۋەتىن ارتتىرۋعا باعىتتالعان. 
فورۋم سوڭىندا قاتىسۋشىلار وڭىرلەرىندە الەۋمەتتىك جوبالاردى جۇزەگە اسىرۋعا قاجەتتى ءبىلىم مەن داعدىلاردى مەڭگەردى.
