داعىستانداعى اششىسۋ اۋىلى ماڭىندا كيزليار ەلەكترمەحانيكالىق زاۋىتىنا تيەسىلى كا-226 تىكۇشاعى قۇلاپ، 5 ادام قازا تاپتى، دەپ حابارلايدى “ادىرنا”.
اپات سالدارىنان ءتورت ادام وقيعا ورنىندا قازا تاۋىپ، تاعى ۇشەۋى اۋرۋحاناعا جەتكىزىلگەن. جارالانعانداردىڭ ءبىرى – تىكۇشاقتىڭ بورتمەحانيگى پەتر سۋروۆ اۋىر حالدە بولىپ، كوپ ۇزاماي ول دا كوز جۇمعان.
حابارلاماعا سايكەس، تىكۇشاق پيرسكە قونۋعا ءساتسىز ارەكەت جاساعاننان كەيىن اپاتقا ۇشىراعان. ودان تىكۇشاقتىڭ قۇيرىق بولىگى سىنىپ كەتكەن، بىرنەشە مينۋت بويى سۋ ۇستىندە اينالىپ ءجۇرىپ، كەيىن بوس تۇرعان جەكە ءۇيدىڭ ۇستىنە قۇلاعان. سالدارىنان ءورت شىعىپ، ونى ءسوندىرىپ ۇلگەرگەن.
اپاتتىڭ نەگىزگى سەبەبى رەتىندە تەحنيكالىق اقاۋ مەن ۇشقىشتىڭ قاتەلىگى قاراستىرىلىپ وتىر. وقيعا بويىنشا «اۋە كولىگىن پايدالانۋ جانە قوزعالىس قاۋىپسىزدىگى ەرەجەلەرىن بۇزۋ، ابايسىزدا ەكى جانە ودان دا كوپ ادامنىڭ ولىمىنە اكەپ سوعۋ» بابى بويىنشا قىلمىستىق ءىس قوزعالدى. روساۆياتسيا وقيعانى «اپات» رەتىندە جىكتەدى.
بورتتا تۋريستەر بولماعان، تەك زاۋىت قىزمەتكەرلەرى عانا بولعان. كاسىپورىننىڭ Telegram-ارناسىندا قازا بولعانداردىڭ سۋرەتتەرى جاريالاندى.
سونىمەن قاتار، تىكۇشاقتا زاۋىتتىڭ اتقارۋشى ديرەكتورى – كاسىپورىن باسشىسىنىڭ ۇلى بولعان. قازىرگى ۋاقىتتا ولار ماحاچقالاداعى كۇيىك ورتالىعىندا ەم قابىلداپ جاتىر.
