29 جەلتوقسان كۇنى ازەربايجان پرەزيدەنتى يلحام اليەۆ «ازەربايجان اۋە جولدارى» كومپانياسىنىڭ باكۋ-گروزنىي رەيسىن ورىنداعان Embraer 190 جولاۋشىلار ۇشاعىنىڭ اپاتىندا جوعارى كاسىبيلىك پەن ەرلىك تانىتقان ادامداردى ماراپاتتاۋ تۋرالى جارلىققا قول قويدى. 1-دارەجەلى «راشادات» وردەنىنىڭ امان قالعان ەكيپاج مۇشەلەرى زۋلفۋگار اسادوۆ پەن ايدانا راگيمليگە بەرىلدى، دەپ حابارلايدى “ادىرنا” ۇلتتىق پورتالى.
Qafqazinfo حابارلاۋىنشا، ازەربايجاندا وسى وردەنمەن ماراپاتتالعانداردىڭ جالپى سانى جەتى ادامعا جەتتى. ايدانا راگيملي العاش رەت «راشادات» وردەنىن العان ايەل رەتىندە تاريحقا ەندى.
ايتا كەتسەك، «راشادات» وردەنى ازەربايجان قارۋلى كۇشتەرىنىڭ اسكەري قىزمەتشىلەرىنە توتەنشە جاعدايلاردا ادامداردى قۇتقارۋدا ەرەكشە ەرلىك كورسەتكەنى ءۇشىن، سونداي-اق ومىرىنە ناقتى قاۋىپ تونگەن جاعدايلاردا قىزمەتتىك مىندەتىن اتقارۋدا باتىلدىق تانىتقانى ءۇشىن بەرىلەدى. باكۋ-گروزنىي رەيسىنىڭ ەكيپاجى ءوز ءىس-ارەكەتتەرىمەن وسى جوعارى ماراپاتقا لايىق ەكەنىن كورسەتتى.
سونىمەن قاتار، حيوكۋما اليەۆا ازەربايجاننىڭ ۇلتتىق باتىرى اتاعىن العان ءۇشىنشى ايەل بولدى. بۇعان دەيىن بۇل قۇرمەتتى اتاق قىزمەتىن اتقارۋ كەزىندە قازا تاپقان جۋرناليست سالاتىن اسكەروۆا مەن مەديتسينا قىزمەتىنىڭ اعا لەيتەنانتى گۇلتەكىن اسكەروۆاعا بەرىلگەن بولاتىن.
