قۇلىباەۆتىڭ AUYL SPORT جوباسى: اۋىلداعى بالالار سپورتىنىڭ جاڭا مودەلى

شالعايداعى اۋىل مەكتەبىنىڭ تار زالدارىنان باستالعان تالاي بالا ارمانى بيىل الماتىدا وزگەشە تىنىس الدى. بيىلعى AUYL SPORT جوباسىنىڭ فينالدىق كەزەڭى بالۋان شولاق اتىنداعى سپورت سارايىندا سالتاناتتى تۇردە اشىلىپ، مىڭداعان اۋىل جاستارىنىڭ ءۇمىتىن ارقالاعان دودا – جاي عانا سپورت جارىسى ەمەس، اۋىل بالاسىنىڭ بولاشاعىن وزگەرتە الاتىن ۇلكەن مۇمكىندىك ەكەنىن انىق اڭعارتتى. "ادىرنا" ءتىلشىسى اۋىل بالالارىنىڭ ارمانىنىڭ ورىندالۋىنا سەپ بولعان جوبانىڭ كەزەكتى مارەسىن كوزبەن كورىپ قايتتى.

AUYL SPORT - اۋىل ارمانىن ۇلكەن ارەناعا شىعارعان جوبا

AUYL SPORT – ەكى جىل قاتارىنان اۋىل جاستارىنا ەسىك اشىپ، ەلدىڭ تۇكپىر-تۇكپىرىندەگى تالانتتاردى ءبىر الاڭعا جيناعان ۇلتتىق جوبا. پرەزيدەنت قاسىم-جومارت توقاەۆ بيىلعى جولداۋىندا بۇقارالىق سپورتتى دامىتۋعا ەرەكشە نازار اۋدارىپ، اۋىلداعى سپورت ينفراقۇرىلىمىن قولداۋدى باسىم باعىت رەتىندە اتاپ ءوتتى.

بۇل باستامانى ءاردايىم قولداپ كەلە جاتقان تيمۋر قۇلىباەۆ جەتەكشىلىك ەتەتىن Halyk قورى جوباعا ەكىنشى جىل قاتارىنان دەمەۋشىلىك جاساپ، اۋىل تالانتتارىن قولداۋدى جۇيەلى تۇردە جالعاستىرىپ كەلەدى.

بيىل تۋرنير جىل باسىنان بەرى 17 وبلىستى، 300-دەن اسا اۋىلدى قامتىپ، 10 مىڭنان استام ءجاسوسپىرىمنىڭ اراسىنان 1700 جۇيرىك ىرىكتەلىپ، 3–6 قاراشادا الماتىداعى ۇلكەن فينالعا جولداما الدى.

بالۋان شولاقتاعى ەرەكشە اتموسفەرا: اۋىل بالالارى قىزىل كىلەمدە

فينالدىڭ اشىلۋ سالتاناتى – بولەك اڭگىمە.

الماتى تورىندەگى بالۋان شولاق اتىنداعى سپورت سارايىنا كىرگەن ساتتەن-اق جوبانىڭ اۋقىمىن سەزىنەسىڭ: كاسىبي ساحنا، جارىق، دىبىس، ۇيىمداستىرۋ - حالىقارالىق دەڭگەيدەن كەم ەمەس.

اشىلۋ ءراسىمى اۋىل سپورتشىلارىنىڭ قىزىل كىلەممەن ءجۇرىپ وتۋىنەن باستالدى. ءار ايماقتىڭ اۋىل بالالارى تىكەلەي ەفيردە ءوز وبلىسىنىڭ نامىسىن قورعاپ، ساحنادان سالتاناتتى تۇردە ءوتتى. بۇل - تەك كورىنىس ەمەس، اۋىلدىڭ قارا دومالاق بالالارى ءۇشىن ۇلكەن ارمانعا العاشقى قادام.

كاسىبي جۇرگىزۋشىلەردىڭ ءسوزى، كاسىبي بيشىلەردىڭ قويىلىمى، بالالاردىڭ تولقىنىسى ءبارى قوسىلىپ، ۇلتتىق دەڭگەيدەگى ۇلكەن سپورت مەرەكەسىنە اينالدى.

ساحنادا وقۋ-اعارتۋ مينيسترلىگىنىڭ وكىلى مەن جوبا جەتەكشىلەرى ءسوز سويلەپ، اۋىل سپورتىنىڭ ەل بولاشاعى ءۇشىن ماڭىزىن اتاپ ءوتتى.

جوبانىڭ جەمىسى: مىڭداعان بالانىڭ ەڭبەگى مەن 1700 ۇزدىكتىڭ الماتىدا توعىسۋى

AUYL SPORT بيىل تەك جارىس ەمەس، اۋىل جاستارىنىڭ مۇمكىندىگىن كەڭەيتكەن الەۋمەتتىك جوباعا اينالدى.

فينالعا قاتىسقان سپورتشىلار تولىقتاي تەگىن قامتاماسىز ەتىلدى:

• ساپالى سپورت كيىمى

• جاتىن ورىن

• تاسىمال

• زاماناۋي جابدىقتالعان الاڭدار

• ۇزدىك تورەشىلەردىڭ تورەلىگى

«بۇل تۋرنير – اۋىل بالالارىنىڭ بولاشاعىنا سالىنعان ينۆەستيتسيا. فينالدا تەك چەمپيوندار ەمەس، بۇكىل ەلدىڭ ءۇمىتى انىقتالدى» – دەدى Halyk قايىرىمدىلىق قورىنىڭ اتقارۋشى ديرەكتورى عالىمبەك جاقسىلىقوۆ. 

بيىل جارىسقا تۇڭعىش رەت ۇستەل تەننيسى ەنگىزىلىپ، اۋىل مەكتەپتەرىندە كاسىبي جاتتىعۋ جۇيەسى ىسكە قوسىلدى. ناتيجەسىندە جاڭا چەمپيوندار ايقىندالدى.

ماڭعىشلاقتان الماتىعا: اۋىلدان شىققان چەمپيوندار

فينال الاڭىندا سپورتشىلار عانا ەمەس، ولاردىڭ اتا-انالارى، جاتتىقتىرۋشىلارى دا ەرەكشە تولقىنىستا بولدى.

ناۋرىزبەك نۇرسۇلتانۇلى، جاتتىقتىرۋشى:

«ماڭعىستاۋ وبلىسى، ماڭعىشلاق اۋدانىنان كاراتە سپورتى بويىنشا كەلدىك. بىلتىر دا قاتىسقانبىز، ءتورت بالامىز چەمپيون بولدى – عانىبەك قايراتۇلى، ايدار ءنۇرالي، زاحار ونيششەنكو جانە مادەنيەت ءمادجان. بيىل ەكىنشى جىل قاتىسىپ وتىرمىز. ءمادي باقتىباي ءوز باعىن سىنايدى. ونىڭ جەڭەتىنىنە سەنەمىن. اۋىل سپورت جوباسى – اۋىل بالاسىنا ەسىك اشاتىن كەرەمەت مۇمكىندىك. بارلىق جاعدايىمىزدى جاساپ، اۋىل بالالارىنىڭ ۇلكەن بەلەستەردەن كورىنۋىنە جول اشىپ جاتقان اتالمىش جوباعا العىسىمىز شەكسىز", دەدى جاتتىقتىرۋشى.

ال ءوز كەزەگىندە جوبانىڭ فينالدىق باسەكەسىنەن ءبىر-اق شىققان كاراتەدەن ورتا ازيا چەمپيونى ءمادي باقتىباي قىسقا دا نۇسقا تىلەگىن ايتتى:

«دايىندىعىمىز كەرەمەت. بارلىعىنا ساتتىلىك، وزىمىزگە جەڭىس تىلەيمىن».

جەڭىمپازدار جولى: اۋىلدان الەمگە

جەڭىمپاز اتانعان بالالار اقشالاي سىيلىقتارمەن ماراپاتتالدى. بىراق بۇل – ولاردىڭ جولىنداعى العاشقى بەلەس قانا.

AUYL SPORT جوباسىنىڭ ارقاسىندا تالاي اۋىل بالاسى حالىقارالىق ارەنالارعا جول اشتى.

بىلتىرعى ماۋسىم جەڭىمپازدارىنىڭ 12-ءسى قازاقستان قۇراماسىنا قابىلدانىپ، سەربيادا وتكەن ISF U-15 گيمنازياداسىنا بارىپ قايتتى. ولار ەلگە 11 مەدال الىپ كەلىپ، ونىڭ تورتەۋىن اۋىل سپورتشىلارى جەڭىپ الدى.

بۇل – اۋىلداعى تالانتتىڭ مۇمكىندىگى شەكسىز ەكەنىن دالەلدەگەن وقيعا بولدى.

ەرەكشە وقيعا: ارمانعا ادالدىقتىڭ ۇلگىسى

جارىستاردىڭ بىرىندە اۋىل بالاسى ماحمەت جاسۇلان اجەسىنە وليمپيادا چەمپيونى اتانسا، مەككەگە اپاراتىنىن ايتقان ەدى.

بالانىڭ وسى ارمانى تۋرالى ەستىگەن جوبا قامقورشىلارى – تيمۋر قۇلىباەۆ باستاعان كوماندا جاس سپورتشىنىڭ اجەسىنە مەككەگە جولداما سىيلادى.

بيىلعى AUYL SPORT — تەك جارىس ەمەس، اۋىل بالاسىنىڭ سەنىمىن وياتقان ۇلكەن قوزعالىس.

مۇندا ءار بالا چەمپيون بولا الادى، ءار وتباسىنىڭ ءۇمىتى جانادى،ء ار اۋىلدىڭ مۇمكىندىگى بار. AUYL SPORT – اۋىلدان باستالعان ارماننىڭ ۇلكەن ارەناعا جولى.

سۋرەتتەر: Halyk قايىرىمدىلىق قورىنىڭ باسپاسوزىنەن