Şalǧaidaǧy auyl mektebınıŋ tar zaldarynan bastalǧan talai bala armany biyl Almatyda özgeşe tynys aldy. Biylǧy AUYL SPORT jobasynyŋ finaldyq kezeŋı Baluan Şolaq atyndaǧy sport saraiynda saltanatty türde aşylyp, myŋdaǧan auyl jastarynyŋ ümıtın arqalaǧan doda – jai ǧana sport jarysy emes, auyl balasynyŋ bolaşaǧyn özgerte alatyn ülken mümkındık ekenın anyq aŋǧartty. "Adyrna" tılşısı auyl balalarynyŋ armanynyŋ oryndaluyna sep bolǧan jobanyŋ kezektı märesın közben körıp qaitty.
AUYL SPORT - auyl armanyn ülken arenaǧa şyǧarǧan joba
AUYL SPORT – ekı jyl qatarynan auyl jastaryna esık aşyp, eldıŋ tükpır-tükpırındegı talanttardy bır alaŋǧa jinaǧan ūlttyq joba. Prezident Qasym-Jomart Toqaev biylǧy Joldauynda būqaralyq sportty damytuǧa erekşe nazar audaryp, auyldaǧy sport infraqūrylymyn qoldaudy basym baǧyt retınde atap öttı.
Būl bastamany ärdaiym qoldap kele jatqan Timur Qūlybaev jetekşılık etetın Halyk qory jobaǧa ekınşı jyl qatarynan demeuşılık jasap, auyl talanttaryn qoldaudy jüielı türde jalǧastyryp keledı.
Biyl turnir jyl basynan berı 17 oblysty, 300-den asa auyldy qamtyp, 10 myŋnan astam jasöspırımnıŋ arasynan 1700 jüirık ırıktelıp, 3–6 qaraşada Almatydaǧy ülken finalǧa joldama aldy.
Baluan Şolaqtaǧy erekşe atmosfera: auyl balalary qyzyl kılemde
Finaldyŋ aşylu saltanaty – bölek äŋgıme.
Almaty törındegı Baluan Şolaq atyndaǧy sport saraiyna kırgen sätten-aq jobanyŋ auqymyn sezınesıŋ: käsıbi sahna, jaryq, dybys, ūiymdastyru - halyqaralyq deŋgeiden kem emes.
Aşylu räsımı auyl sportşylarynyŋ qyzyl kılemmen jürıp ötuınen bastaldy. Är aimaqtyŋ auyl balalary tıkelei efirde öz oblysynyŋ namysyn qorǧap, sahnadan saltanatty türde öttı. Būl - tek körınıs emes, auyldyŋ qara domalaq balalary üşın ülken armanǧa alǧaşqy qadam.
Käsıbi jürgızuşılerdıŋ sözı, käsıbi bişılerdıŋ qoiylymy, balalardyŋ tolqynysy bärı qosylyp, ūlttyq deŋgeidegı ülken sport merekesıne ainaldy.
Sahnada Oqu-aǧartu ministrlıgınıŋ ökılı men joba jetekşılerı söz söilep, auyl sportynyŋ el bolaşaǧy üşın maŋyzyn atap öttı.
Jobanyŋ jemısı: myŋdaǧan balanyŋ eŋbegı men 1700 üzdıktıŋ Almatyda toǧysuy
AUYL SPORT biyl tek jarys emes, auyl jastarynyŋ mümkındıgın keŋeitken äleumettık jobaǧa ainaldy.
Finalǧa qatysqan sportşylar tolyqtai tegın qamtamasyz etıldı:
-
sapaly sport kiımı
-
jatyn oryn
-
tasymal
-
zamanaui jabdyqtalǧan alaŋdar
-
üzdık töreşılerdıŋ törelıgı
«Būl turnir – auyl balalarynyŋ bolaşaǧyna salynǧan investisiia. Finalda tek chempiondar emes, bükıl eldıŋ ümıtı anyqtaldy» – dedı Halyk qaiyrymdylyq qorynyŋ atqaruşy direktory Ǧalymbek Jaqsylyqov.
Biyl jarysqa tūŋǧyş ret üstel tennisı engızılıp, auyl mektepterınde käsıbi jattyǧu jüiesı ıske qosyldy. Nätijesınde jaŋa chempiondar aiqyndaldy.
Maŋǧyşlaqtan Almatyǧa: auyldan şyqqan chempiondar
Final alaŋynda sportşylar ǧana emes, olardyŋ ata-analary, jattyqtyruşylary da erekşe tolqynysta boldy.
Nauryzbek Nūrsūltanūly, jattyqtyruşy:
«Maŋǧystau oblysy, Maŋǧyşlaq audanynan karate sporty boiynşa keldık. Byltyr da qatysqanbyz, tört balamyz chempion boldy – Ǧanıbek Qairatūly, Aidar Nūräli, Zahar Onişenko jäne Mädeniet Mädjan. Biyl ekınşı jyl qatysyp otyrmyz. Mädi Baqtybai öz baǧyn synaidy. Onyŋ jeŋetınıne senemın. Auyl sport jobasy – auyl balasyna esık aşatyn keremet mümkındık. Barlyq jaǧdaiymyzdy jasap, auyl balalarynyŋ ülken belesterden körınuıne jol aşyp jatqan atalmyş jobaǧa alǧysymyz şeksız", dedı jattyqtyruşy.
Al öz kezegınde jobanyŋ finaldyq bäsekesınen bır-aq şyqqan karateden Orta Aziia chempiony Mädi Baqtybai qysqa da nūsqa tılegın aitty:
«Daiyndyǧymyz keremet. Barlyǧyna sättılık, özımızge jeŋıs tıleimın».
Jeŋımpazdar joly: auyldan älemge
Jeŋımpaz atanǧan balalar aqşalai syilyqtarmen marapattaldy. Bıraq būl – olardyŋ jolyndaǧy alǧaşqy beles qana.
AUYL SPORT jobasynyŋ arqasynda talai auyl balasy halyqaralyq arenalarǧa jol aşty.
Byltyrǧy mausym jeŋımpazdarynyŋ 12-sı Qazaqstan qūramasyna qabyldanyp, Serbiiada ötken ISF U-15 Gimnaziadasyna baryp qaitty. Olar elge 11 medal alyp kelıp, onyŋ törteuın auyl sportşylary jeŋıp aldy.
Būl – auyldaǧy talanttyŋ mümkındıgı şeksız ekenın däleldegen oqiǧa boldy.
Erekşe oqiǧa: armanǧa adaldyqtyŋ ülgısı
Jarystardyŋ bırınde auyl balasy Mahmet Jasūlan äjesıne Olimpiada chempiony atansa, Mekkege aparatynyn aitqan edı.
Balanyŋ osy armany turaly estıgen joba qamqorşylary – Timur Qūlybaev bastaǧan komanda jas sportşynyŋ äjesıne Mekkege joldama syilady.
Biylǧy AUYL SPORT — tek jarys emes, auyl balasynyŋ senımın oiatqan ülken qozǧalys.
Mūnda är bala chempion bola alady, är otbasynyŋ ümıtı janady, är auyldyŋ mümkındıgı bar. AUYL SPORT – auyldan bastalǧan armannyŋ ülken arenaǧa joly.
suretter: Halyk qaiyrymdylyq qorynyŋ baspasözınen
