تاجىكتەردىڭ باسقا ەلدەردە جاساعان لاڭكەستىك ارەكەتتەرىنىڭ سانى كوبەيىپ، مەملەكەت باسشىسىنىڭ نازارىن اۋدارتتى، دەپ حابارلايدى "ادىرنا" ءتىلشىسى ازيا پليۋسكە سىلتەپ.
ەمومالي راحمون ناۋرىزدا قوعام وكىلدەرىمەن جانە ءدىن قايراتكەرلەرىمەن كەزدەسۋىندە لاڭكەستەردىڭ مەملەكەت بەدەلىنە كىر كەلتىرىپ جۇرگەنىن ايتتى.
مەملەكەت باسشىسىنىڭ ءباسپاسوز قىزمەتىنىڭ حابارلاۋىنشا، ءۇش جىلدا الەمنىڭ 10 ەلىندە تاجىكستاننىڭ 24 ازاماتى لاڭكەستىك ارەكەتتەر جاساعان. ودان بولەك كوپشىلىك ىشىندە ءوز-ءوزىن جارىپ جىبەرگەندەر دە بار.
پرەزيدەنت ءوز-وزىنە قول جۇمساۋ – يسلام ءدىنىنىڭ نەگىزدەرىنە قايشى كەلەتىن كۇنا ەكەنىن ەسكە سالدى.
10 جىل ىشىندە تاجىك ازاماتتارىنىڭ تاراپىنان ەكسترەميستىك جانە تەرروريستىك سيپاتتاعى 6680 قىلمىس انىقتالىپ، تىركەلگەن.
«تەك 2023 جىلدىڭ وزىندە زاڭسىز ءدىني ءبىلىم بەرۋدىڭ 300 فاكتىسى انىقتالىپ، بالالاردىڭ، جاسوسپىرىمدەر مەن جاستاردىڭ ميىن ۋلاۋ ماقساتىندا 4100-دەن استام ادامنىڭ قاتىسۋىمەن جيىنداردىڭ وتكەنى تەرىس اعىمنىڭ كۇشەيگەنىن كورسەتەدى»، - دەدى ەمومالي راحمون.
سوڭعى ءبىر جىلدا تاجىكتەردىڭ راديكالدى توپتارمەن بايلانىسى نەمەسە لاڭكەستىك ارەكەتتەرگە قاتىسى بار 10-عا جۋىق وقيعا تىركەلگەن.
اتاپ ايتقاندا، بۇل يران، گەرمانيا، نيدەرلاندى، قازاقستان جانە باسقا ەلدەردەگى شابۋىلدار مەن جارىلىستارعا قاتىستى. ولاردىڭ كەيبىرى قاماۋعا الىندى، باسقالارى لاڭكەستىك شابۋىلداردا قازا تاپتى.
