بۇگىن قاراعاندىدا 22 جاستاعى اليكا مۇحاماديەۆاعا قاتىستى ۇكىم شىعارىلدى. ول الەۋمەتتىك جانە ۇلتارالىق ارازدىقتى قوزدىردى دەگەن ايىپپەن 3,5 جىلعا باس بوستاندىعىنان ايىرىلدى. بىراق جازاسى 2 جىلعا كەيىنگە قالدىرىلدى، سەبەبى كىشكەنتاي بالاسى بار، دەپ حابارلايدى “ادىرنا”.
پروكۋرور ايىپتالۋشىعا 4,5 جىل باس بوستاندىعىنان ايىرۋ جازاسىن سۇرادى، الايدا ۇكىمنىڭ ورىندالۋىن ءتورت جىلعا — ونىڭ قىزى 14 جاسقا تولعانعا دەيىن كەيىنگە قالدىرۋدى ءوتىندى.
بۇگىن قاراعاندى قالاسىنىڭ قازىبەك بي اتىنداعى اۋدانىنىڭ سوتى اليكا مۇحاماديەۆاعا قاتىستى قىلمىستىق كودەكستىڭ 174-بابىنىڭ 1-بولىگى بويىنشا باس بوستاندىعىنان ايىرۋ جازاسىن تاعايىنداعان ايىپتاۋ ۇكىمىن شىعاردى.وسى ۇكىممەن وعان قىلمىستىق كودەكستىڭ 74-بابىنىڭ تارتىبىندە جازانى ورىنداۋدى كەيىنگە قالدىرۋ شاراسى تاعايىندالدى. كەيىنگە قالدىرۋدى قولدانۋعا ونىڭ 2 جاسار بالاسىنىڭ بولۋى نەگىز بولدى. اليكا مۇحاماديەۆا 3,5 جىلعا باس بوستاندىعىنان ايىرىلاتىن بولدى.
ەسكە سالايىق، اليكا مۇحاماديەۆا شىلدە ايىندا الەۋمەتتىك جەلىدە جاريالاعان قورلايتىن جازبالارى مەن پىكىرلەرى ءۇشىن ۇستالعان. ول قازاقستاندىقتاردى «مامبەت»، مۇسىلمانداردى «دوڭىز»، ال قازاق ءتىلىن «جارتىلاي قالبيت ديالەكتىسى» دەپ اتاعان.
بۇل جازبالار قوعامدا ۇلكەن نارازىلىق تۋعىزدى. ارتىنشا اليكا ۆيدەو ارقىلى كەشىرىم سۇراپ، ءوز ارەكەتىنە وكىنەتىنىن ايتتى. بىراق بۇل ونىڭ جاعدايىن جەڭىلدەتپەدى – وعان قاتىستى قر قىلمىستىق كودەكسىنىڭ 174-بابى («ۇلتارالىق ارازدىقتى قوزدىرۋ») بويىنشا ءىس قوزعالدى.
بۇگىن سوتتا مۇحاماديەۆا كوزىنە جاس الىپ، كوپشىلىكتەن كەشىرىم سۇرادى.
«قاتتى ۇيالامىن، كىنامدى مويىندايمىن. مەنىڭ كىشكەنتاي قىزىمنىڭ بار ەكەنىن ەسكەرۋلەرىڭىزدى سۇرايمىن. ادام قولىندا باردىڭ قادىرىن ونى جوعالتقاندا عانا تۇسىنەدى»، — دەدى ول.
