فوتو: Christopher Furlong - WPA Pool/Getty Images
ۇلىبريتانيا كورولى ءىىى كارلدىڭ ءىنىسى ەندريۋ ماۋنتبەتتەن‑ۆيندزور حانزادا ءوزىنىڭ تيتۋلىنان ايىرىلىپ، رەزيدەنتسياسى Royal Lodge-نى تاستايدى. بۇل تۋرالى بۋكينگەم سارايى مالىمدەدى، دەپ حابارلايدى “ادىرنا”.
قۇجاتتا كورسەتىلگەندەي، بۇدان بىلاي ول «ەندريۋ ماۋنتبەتتەن-ۆيندزور» دەپ اتالادى.
سارايدىڭ دەرەگىنشە، كورول كەشە رەسمي تۇردە ەندريۋدى تيتۋلدار مەن كورولدىك قۇقىقتارىنان ايىرۋ ءراسىمىن باستاعان. بۇعان دەيىن ول Royal Lodge رەزيدەنتسياسىندا تۇرىپ كەلگەن بولاتىن.
«ەندريۋعا جالعا الۋ كەلىسىمىن توقتاتۋ تۋرالى رەسمي حابارلاما جىبەرىلدى. ول باسقا جەكە مەنشىك تۇرعىن ۇيگە كوشەدى. بۇل شارالار ونىڭ وزىنە تاعىلعان ايىپتاردى جوققا شىعارعانىنا قاراماستان قاجەت دەپ تانىلدى»، — دەلىنگەن سارايدىڭ حابارلاماسىندا.
سوڭعى ۋاقىتتاردا ەندريۋ قوعام تاراپىنان ۇلكەن قىسىمعا ۇشىراپ كەلەدى. بۇعان ونىڭ اتى امەريكالىق ميللياردەر دجەففري ەپشتەينمەن جانە سەكسۋالدىق قىلمىستار ءۇشىن سوتتالعان گيسلەين ماكسۆەلل مەن حارۆي ۆاينشتەينمەن بايلانىسى سەبەپ بولدى.
بيىل جاڭا دەرەكتەر پايدا بولىپ، 2006 جىلى ەندريۋدىڭ ءوز رەزيدەنتسياسىندا — Royal Lodge ۇيىندە — ەپشتەيندى، ماكسۆەللدى جانە ۆاينشتەيندى قابىلداعانى انىقتالعان. بۇل كەزدەسۋ ونىڭ قىزى، بەاتريسا حانشايىمنىڭ 18 جاسقا تولۋ مەرەكەسىندە وتكەن.
كورول سارايىنىڭ وكىلدەرى بۇل شەشىمنىڭ «مونارحيانىڭ بەدەلىن ساقتاۋ جانە قوعامدىق سەنىمدى قالپىنا كەلتىرۋ ءۇشىن قاجەت» ەكەنىن اتاپ ءوتتى.
ۇلىبريتانيا ۇكىمەتى دە بۇل شەشىمدى قولداپ، ونى «دۇرىس ءارى ۋاقىتىلى قادام» دەپ باعالادى.
