ۇلىبريتانيانىڭ قورعانىس مينيسترلىگى كورولدىك اسكەري-تەڭىز كۇشتەرىنىڭ كەمەلەرى لا-مانش بۇعازىندا رەسەيلىك اسكەري كەمەلەردى توسىپ الىپ، ولاردى باقىلاۋ وپەراتسياسىن جۇرگىزگەنىن مالىمدەدى. بۇل تۋرالى Sky News اقپارات تاراتتى، دەپ حابارلايدى "ادىرنا".
ەكى كۇنگە سوزىلعان وپەراتسياعا پورتسمۋت پورتىندا ورنالاسقان HMS Mersey جانە HMS Severn پاترۋلدىك كەمەلەرى، سونداي-اق Wildcat اسكەري تىكۇشاعى جۇمىلدىرىلدى. بريتاندىق اسكەري كۇشتەر سولتۇستىك تەڭىزگە بەت العان رەسەيلىك «بويكي» كورۆەتى مەن MT General Skobelev مۇناي تانكەرىنىڭ قوزعالىسىن باقىلاۋعا العان.
الدىمەن HMS Mersey رەسەيلىك كەمەلەردى لا-مانش بۇعازىنا كىرەبەرىستە توسىپ الىپ، ولاردى بيسكاي شىعاناعىندا باقىلاپ جۇرگەن ناتو-عا مۇشە ەلدەردىڭ اسكەري كۇشتەرىنەن باقىلاۋ مىندەتىن قابىلداپ الدى.
كەيىن ۋايت ارالى ماڭىندا HMS Mersey مەن HMS Severn Wildcat تىكۇشاعىمەن بىرلەسىپ، كەمەلەر توبىنا ۇيلەسىمدى تۇردە باقىلاۋ جۇرگىزدى. HMS Severn رەسەيلىك كەمەلەر سولتۇستىك تەڭىزگە شىققانعا دەيىن ىلەسىپ، ودان ءارى باقىلاۋ جاۋاپكەرشىلىگىن ناتو-داعى وداقتاس ەلدىڭ اسكەري كۇشتەرىنە تاپسىردى.
ۇلىبريتانيا قورعانىس مينيسترلىگى بۇل وپەراتسيا حالىقارالىق تەڭىز قاۋىپسىزدىگىن قامتاماسىز ەتۋ جانە وداقتاستارمەن ءوزارا ارەكەتتەستىكتى نىعايتۋ اياسىندا جۇزەگە اسىرىلعانىن اتاپ ءوتتى.
