ريو-دە-جانەيرودا ەسىرتكى ساۋداسى مەن ۇيىمداسقان قىلمىسقا قارسى جۇرگىزىلگەن اۋقىمدى پوليتسيا رەيدى كەزىندە كەمىندە 64 ادام قازا تاپتى، دەپ حابارلايدى «ادىرنا» ءتىلشىسى Reuters-كە سىلتەمە جاساپ.
قالانىڭ سولتۇستىگىندە ورنالاسقان كومپلەكسو-دۋ-الەماو جانە كومپلەكسو-دا-پەنيافاۆەلدەرىندە «Comando Vermelho» كارتەلىنە قارسى جۇرگىزىلگەن قارۋلى وپەراتسيا 17 ساعاتقاسوزىلعان. رەيدكە اۋە پوليتسياسى مەن ارنايى جاساقتار قاتىسقان.
شەتەلدىك باق مالىمەتىنشە، كەمىندە 2500 قاۋىپسىزدىك قىزمەتكەرى وپەراتسياعا جۇمىلدىرىلىپ، شامامەن 100 تۇتقىنداۋ وردەرىن ورىنداۋ كوزدەلگەن. پوليتسيانىڭ ايتۋىنشا، بۇل شارا قىلمىستىق توپتىڭ ءبىر جىل بويى زەرتتەلگەن ارەكەتتەرى نەگىزىندە ۇيلەستىرىلىپ جۇرگىزىلگەن.
رەسمي دەرەكتەرگە سۇيەنسەك، قازا تاپقانداردىڭ كوبى — قىلمىستىق توپ مۇشەلەرى. ودان بولەك،4 پوليتسيا قىزمەتكەرى مەرت بولىپ، تاعى 15 قىزمەتكەر جارالانعان.
ريو-دە-جانەيرو شتاتىنىڭ گۋبەرناتورى كلاۋديو كاسترو قالا تاريحىنداعى ەڭ ءىرى وپەراتسيالاردىڭ ءبىرى كەزىندە قىلمىس جاساعان دەگەن كۇدىككە ىلىنگەن 60 ادامنىڭ “زالالسىزداندىرىلعانىن” حابارلادى.
وپەراتسيا بارىسىندا 80 كۇدىكتى ۇستالىپ, ولاردىڭ قاتارىندا كارتەل باسشىلارىنىڭ ءبىرى دە بولعان. سونداي-اق شامامەن 100 اتىس قارۋى تاركىلەندى. شتات بيلىگىنىڭ مالىمدەۋىنشە، قازا تاپقاندار پوليتسياعا قارسىلىق كورسەتكەن. رەيدكە جاۋاپ رەتىندە قىلمىستىق توپ مۇشەلەرى اتىس ۇيىمداستىرىپ, ريو-دە-جانەيرونىڭ سولتۇستىك جانە وڭتۇستىك-شىعىس بولىكتەرىندەگى جولداردى جاۋىپ تاستاعان.
