تۇركىستان وبلىسى: ورداباسى اۋدانىندا جاڭا فارماتسەۆتيكالىق كاسىپورىن ىسكە قوسىلدى

ورداباسى اۋدانى، بادام اۋىلدىق وكرۋگىنە قاراستى قاراباستاۋ اۋىلىندا «دارىن-2030» فارماتسەۆتيكالىق وندىرىستىك كاسىپورنى اشىلدى.

زاماناۋي تالاپتارعا ساي جابدىقتالعان نىسان كلينيكالىق-باكتەريولوگيالىق زەرتحانالارعا ارنالعان مەديتسينالىق رەاگەنتتەردى وندىرۋگە باعىتتالعان. مۇندا «قورەكتىك ورتاعا ارنالعان دەفيبريندەلگەن قوي جانە جىلقى قانى، زارارسىزداندىرىلعان» جانە «قورەكتىك ورتاعا ارنالعان يناكتيۆتەلگەن جىلقى سارىسۋى» سىندى جوعارى ساپالى ونىمدەر دايىندالادى.

كاسىپورىننىڭ نەگىزىن قالاۋشى – 40 جىلدان استام تاجىريبەسى بار پروۆيزور، فارماتسەۆتيكا سالاسىنىڭ بىلىكتى مامانى دجۋزەنوۆا گۋليا بەكسۋلتانقىزى. ول جاڭا ءوندىرىس ورنى ارقىلى ەل مەديتسيناسىنا ساپالى وتاندىق ءونىم ۇسىنۋدى جانە جەرگىلىكتى تۇرعىندار ءۇشىن جاڭا جۇمىس ورىندارىن اشۋدى ماقسات ەتكەن.

نىساننىڭ اشىلۋىندا تۇركىستان وبلىستىق ءماسليحاتىنىڭ توراعاسى نۇرالى ءابىشوۆ قۇتتىقتاۋ ءسوز سويلەپ، جاڭا كاسىپورىننىڭ ەل ەكونوميكاسىنا قوسار ۇلەسىنە توقتالدى. ول وڭىردە وسىنداي يننوۆاتسيالىق باعىتتاعى جوبالاردىڭ ارتا ءتۇسۋى – مەملەكەتتىڭ يندۋستريالىق-يننوۆاتسيالىق ساياساتىنىڭ ناقتى ناتيجەسى ەكەنىن اتاپ ءوتتى.

اۋدان اكىمى ازات ورالباەۆ زاماناۋي نىساننىڭ اشىلۋىمەن تۇرعىنداردى قۇتتىقتادى.

 «مەملەكەت باسشىسىنىڭ يندۋستريالىق-يننوۆاتسيالىق دامۋ ساياساتى اياسىندا ەلىمىزدە جوعارى تەحنولوگيالى، يمپورتتى الماستىراتىن ونىمدەردى وندىرۋگە باسا نازار اۋدارىلىپ كەلەدى. وسى باعىتتاعى بۇگىنگى ماڭىزدى قادام – اۋدانىمىزدا وسىنداي بىرەگەي ءوندىرىستىڭ اشىلۋى. «دارىن-2030» سەرىكتەستىگىنىڭ باستاماسى – بۇل تەك جاڭا جۇمىس ورىندارى عانا ەمەس، سونىمەن قاتار وتاندىق مەديتسينا مەن دەنساۋلىق ساقتاۋ سالاسىن دامىتۋعا قوسىلعان سۇبەلى ۇلەس. ەندىگى جەردە شەتەلدەن اكەلىنەتىن ونىمدەر ءوز جەرىمىزدە، ءوز ماماندارىمىزدىڭ كۇشىمەن وندىرىلەدى»، – دەدى اۋدان باسشىسى.

ارالاۋ بارىسىندا زاۋىتتىڭ وندىرىستىك ۇدەرىسى مەن زاماناۋي تەحنولوگيالاردىڭ جۇمىسى كوپشىلىككە تانىستىرىلدى.

جاڭا فارماتسەۆتيكالىق كاسىپورىننىڭ ىسكە قوسىلۋى – ءوڭىر ەكونوميكاسىن ءارتاراپتاندىرۋ مەن مەديتسينالىق سالانى دامىتۋ جولىنداعى ماڭىزدى باستاما بولماق.