تۇركىستان وبلىسىنداعى تسەمەنت زاۋىتىندا جارىلىس بولىپ، ءبىر ادام قازا تاپتى. تاعى ەكى جۇمىسشى اۋىر حالدە جانساقتاۋ بولىمىندە جاتىر، دەپ جازادى "ادىرنا" سايتى كتك ارناسىنىڭ جاڭالىقتارىنا سىلتەپ.
توتەنشە وقيعا وڭىردەگى ساستوبە تسەمەنت زاۋىتىندا 14-قاراشا كۇنى بولعان. تسەحتاردىڭ بىرىندە جارىلىس بولىپ، ارتى الاپات ورتكە ۇلاسقان. كاسىپورىندا سول ۋاقىتتا ونداعان جۇمىسشى بولعان. ءتىلسىز جاۋدان ءۇش ادامدى كۇيىك شالىپ، ولار سايرام اۋدانى اۋرۋحاناسىنا جەتكىزىلگەن. بىراق دەنەسىن ءجۇز پايىز كۇيىك شالعان 52 جاستاعى جۇمىسشى كوپ ۇزاماي كوز جۇمدى. تاعى ەكى ناۋقاس جانساقتاۋ بولىمىندە جاتىر. قازا تاپقان ازامات پەن جاراقات العاندار جەرگىلىكتى تۇرعىندار.
قازىر تسەمەنت زاۋىتى ۋاقىتشا جۇمىسىن توقتاتتى. ال كاسىپورىن باسشىلارى وقىس وقيعانىڭ ءمان-جايىن اشىپ ايتا المادى. جانساقتاۋ بولىمىندە جاتقان 58 جانە 34 جاستاعى جۇمىسشىلاردىڭ جاعدايى وتە اۋىر دەيدى دارىگەرلەر:
"بىرەۋىندە 100 پايىز كۇيىك بار، ەكىنشىسىندە 70 پايىز. جاعدايى وتە اۋىر. ءوزىمىزدىڭ دارىگەرلەر، سونىمەن قاتار شىمكەنت قالاسىندا ورنالاسقان كۇيىك ورتالىعىنان كەلگەن رەانيماتولوگ دارىگەرلەرمەن بىرگە ەمدەۋ تامسىلدەرىن قولدانىپ جاتىرمىز. ازىرگە جاعدايى وتە اۋىر، ەشتەڭە ايتا المايمىز" دەدى سايرام اۋدانى اۋرۋحاناسىنىڭ باس دارىگەرى ەرعالي الىمباەۆ.
