تۇركىستان وبلىسىندا تاعى ءبىر الەۋمەتتىك دۇكەن اشىلدى

تۇركىستان وبلىسى، ورداباسى اۋدانىنداعى تەمىرلان ەلدى مەكەنىندە ازىق-تۇلىك باعاسىن تۇراقتاندىرۋ ماقساتىندا جاڭا الەۋمەتتىك دۇكەن اشىلدى.

الەۋمەتتىك دۇكەندەر جوباسى تۇرعىنداردى قولجەتىمدى ءارى ساپالى ازىق-تۇلىك ونىمدەرىمەن قامتاماسىز ەتۋ، باعانىڭ تۇراقتىلىعىن ساقتاۋ جانە وتاندىق تاۋار وندىرۋشىلەردى قولداۋعا باعىتتالعان. 

جوبا اياسىندا «تۇركىستان» الەۋمەتتىك-كاسىپكەرلىك كورپوراتسياسىمەن كەلىسىمشارت جاسالىپ، دۇكەنگە 18 ءتۇرلى الەۋمەتتىك ماڭىزى بار ازىق-تۇلىك ءونىمى جەتكىزىلۋدە. سونىمەن قاتار «ورداباسى قۇس»، «ورداباسى نان»، «بورتە ميلكا»، «ينفراستروي لتد» جشس سياقتى جەرگىلىكتى كاسىپورىندارمەن دە ارىپتەستىك ورناتىلعان. 

اتالعان كاسىپورىنداردىڭ ونىمدەرى دۇكەن سورەلەرىندە ءوندىرۋشى باعاسىمەن، ياعني نارىقتاعى باعادان شامامەن 20 پايىزعا تومەن ساتىلۋدا.

ايتا كەتەيىك، اتالعان الەۋمەتتىك دۇكەندە 18 ءتۇرلى ازىق-تۇلىك ءونىمى قولجەتىمدى باعادا ۇسىنىلعان. مىسالى، 10 دانا جۇمىرتقانىڭ باعاسى 450 تەڭگە بولسا، 1 كەلى ۇننىڭ باعاسى – 190 تەڭگە. سونىمەن قاتار كۇرىش (1 كگ) – 350 تەڭگە، كارتوپ (1 كگ) – 130 تەڭگە، پياز (1 كگ) – 65 تەڭگە، ءسابىز (1 كگ) – 110 تەڭگە، 1 ليتر سۇيىق ماي 610 تەڭگەدەن ساتىلۋدا. 

الەۋمەتتىك ماڭىزى بار ازىق-تۇلىك باعاسىن تۇراقتاندىرۋ باعىتىنداعى جۇمىستار تۇركىستان وبلىسىنىڭ اكىمى نۇرالحان كوشەروۆتىڭ ءجىتى باقىلاۋىندا تۇر.