Qytai men Özbekstanda tüsırgen prankterı üşın synǧa ūşyraǧan bloger Arujan Aibekqyzy KAZINFORM agenttıgıne bergen sūqbatynda öz äreketterınen keiın belgılı bır şeşım qabyldaǧanyn aitty, dep habarlaidy "Adyrna" ūlttyq portaly.
“Men Qazaqstanmen şekaralas elderde mūndai prank tüsırmeimın. Al basqa memleketterge barsam, oilanyp köremın”, – degen ol.
Blogerdıŋ aituynşa, soŋǧy oqiǧalardan keiın onyŋ jeke tūlǧasyna qatysty auyr pıkırler men balaǧat sözder jazylǧan.
“Men turaly türlı jalǧan aqparattar tarady. Endı sol paraqşalarǧa qatysty qūqyq qorǧau organdaryna aryz tüsırgım keledı”, – dep atap öttı ol.
Būǧan deiın Arujan Aibekqyzy Özbekstan metrosynda tüsırgen prankı üşın “Ūsaq būzaqylyq” baby boiynşa 20 ailyq eseptık körsetkış (78 myŋ teŋge) kölemınde aiyppūl tölegen bolatyn.
“Alǧaşynda tüsınbedım. Video Özbekstanda tüsırılse, nege aiyppūldy Qazaqstan salady dep oiladym. Bıraq men QR azamaty bolǧandyqtan, şara osynda qabyldanady eken. Sot şeşımımen kelısemın”, – deidı bloger.
Onyŋ aituynşa, sotta videolarda harassment belgılerı bar delıngen. “Men eşkımge zorlyq-zombylyq körsetken joqpyn. Prankterım äzıl retınde tüsırıledı. Kerısınşe, avtobusta nemese qoǧamdyq kölıkte äielderge jasalatyn älımjettıkke nazar audartqym keledı”, – deidı ol.
Eske sala keteiık, Arujan Aibekqyzy Qytaida da qoǧamdyq orynda prank jasaǧan. Özınıŋ aituynşa, jergılıktı qūqyq qorǧau organdary sol kezde eskertu jasaumen şektelgen.
