Instagram-نان باستالعان جول الەمدىك ماراپاتقا ۇلاستى. قازاقستاندىق ۆيدەوگراف ءارى ترەۆەل-بلوگەر داستان مۇحامەدراحىم WIBA Awards 2026 حالىقارالىق سىيلىعىنىڭ «الەمنىڭ ۇزدىك ترەۆەل-بلوگەرى» اتالىمى بويىنشا جەڭىمپازى اتاندى.
ماراپاتتاۋ ءراسىمى فرانتسيادا، كانن كينوفەستيۆالى اياسىندا ۇيىمداستىرىلعان شارالاردىڭ بىرىندە ءوتتى.
داستان قۋانىشتى جاڭالىقتى الەۋمەتتىك جەلىدەگى پاراقشاسىندا ءبولىسىپ، سالتاناتتى كەشتەن ۆيدەولار جاريالادى. وسىلايشا قازاقستاندىق بلوگەردىڭ ەسىمى الەمگە تانىمال ينفليۋەنسەرلەرمەن قاتار اتالدى.
WIBA Awards – حالىقارالىق دەڭگەيدە تانىلعان كونتەنت اۆتورلارىن ماراپاتتايتىن بەدەلدى سىيلىقتاردىڭ ءبىرى. بۇل ماراپات digital-يندۋسترياعا ىقپال ەتىپ، اۋديتوريا نازارىن اۋدارا العان اۆتورلارعا تابىستالادى.
داستان مۇحامەدراحىمنىڭ ۆيدەولارى تابيعاتتىڭ كوركىن، ءتۇرلى قالالاردىڭ اتموسفەراسىن جانە ەلدەردىڭ مادەنيەتىن ەرەكشە كينو ستيلىندە كورسەتۋىمەن ەرەكشەلەنەدى. سوڭعى ءبىر جىل ىشىندە ونىڭ كوپتەگەن روليگى ميلليونداعان قارالىم جيناپ، كەيبىرى Instagram جەلىسىنىڭ رەسمي پاراقشالارى مەن ۇسىنىمدارىنا شىققان.
جەلى قولدانۋشىلارى مەن ارىپتەستەرى بلوگەردى جەڭىسىمەن قۇتتىقتاپ، بۇل جەتىستىكتى قازاقستاندىق بلوگينگ ءۇشىن ماڭىزدى وقيعا دەپ باعالاپ جاتىر.
ايتا كەتەيىك، بۇعان دەيىن داستان مۇحامەدراحيم WIBA Awards 2026 جەڭىمپازدارىنىڭ قاتارىنا ەنگەنىن حابارلاعان بولاتىن. الايدا ماراپاتتى تابىستاۋ ءراسىمى ەندى ۇيىمداستىرىلدى.
