ارمەنيا پرەمەر-ءمينيسترى نيكول پاشينيان قازاقستان پرەزيدەنتى قاسىم-جومارت توقاەۆتى رەسپۋبليكا كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى.
قۇتتىقتاۋ حاتىندا پاشينيان قازاقستاننىڭ تاۋەلسىز مەملەكەتتىلىگىن نىعايتۋعا، ساياسي جانە ازاماتتىق ينستيتۋتتاردىڭ دامۋىنا، سونداي-اق الەۋمەتتىك-ەكونوميكالىق جانە مادەني وركەندەۋگە باعىتتالعان رەفورمالاردىڭ ماڭىزىن اتاپ ءوتتى.
ء«سىزدىڭ كورەگەن ساياساتىڭىز بەن جۇيەلى قادامدارىڭىزدىڭ ارقاسىندا قازاقستان ايماقتىق جانە جاھاندىق دەڭگەيدە ماڭىزدى ءرول اتقارىپ، حالىقارالىق ارەنادا زور قۇرمەتكە يە بولدى»، - دەدى ول.
ارمەنيا پرەمەر-ءمينيسترى ەكى ەل اراسىنداعى دوستىق پەن ءوزارا قۇرمەتكە نەگىزدەلگەن قارىم-قاتىناستاردىڭ دامي تۇسەتىنىنە سەنىم ءبىلدىردى. سونىمەن قاتار، پاشينيان الداعى ۋاقىتتا جوسپارلانعان قازاقستانعا رەسمي ساپارى كەزىندە مەملەكەتارالىق ىنتىماقتاستىق ماسەلەلەرىن تالقىلاۋعا نيەتتى ەكەنىن ايتتى.
«سىزگە مىقتى دەنساۋلىق جانە دوستاس قازاقستان حالقى يگىلىگى جولىنداعى ەڭبەگىڭىزگە تابىس تىلەيمىن»، - دەپ تۇيىندەدى نيكول پاشينيان.
ايتا كەتسەك، بيىل تامىز ايىندا قاسىم-جومارت توقاەۆ پاشينيانمەن تەلەفون ارقىلى سويلەسىپ، ارمەنيا پرەمەر-ءمينيسترىنىڭ استاناعا رەسمي ساپارىنا دايىندىق باستالعانىن حابارلاعان بولاتىن.
