رەسپۋبليكا كۇنى الماتى وبلىسىندا جاستارعا ارنالعان «تاۋەلسىزدىك ۇرپاقتارى» گرانتىنىڭ جەڭىمپازدارى بەلگىلى بولدى.
بۇل كۇن – ەلدىڭ تاۋەلسىزدىگى مەن جاڭا باستامالاردىڭ سيمۆولىنا اينالعان مەرەكە عانا ەمەس، ءوز ارمانى مەن يدەياسىن جۇزەگە اسىرۋعا ۇمتىلعان جاستار ءۇشىن دە ەرەكشە ءسات بولدى.
جوبا بيىل دا ءوڭىر جاستارىنىڭ ارمانىن جۇزەگە اسىرىپ، جاڭا يدەيالاردىڭ قاناتتانۋىنا مۇمكىندىك بەرىپ وتىر. گرانت يەگەرلەرى ءتۇرلى باعىتتار بويىنشا ىرىكتەلىپ، وزدەرىنىڭ الەۋمەتتىك، مادەني، عىلىمي جانە يننوۆاتسيالىق باستامالارىن قورعادى.
قاتىسۋشىلاردىڭ جوبالارى قوعامنىڭ وزەكتى ماسەلەلەرىن شەشۋگە، جاستاردى دامىتۋعا جانە جاڭا تەحنولوگيالاردى ەنگىزۋگە باعىتتالعان.
جەڭىمپازداردىڭ قاتارىندا:
تالعاتقىزى ايزەرە – مۇمكىندىگى شەكتەۋلى بالالارعا ارنالعان جەكە وڭالتۋ جابدىقتارى مەن ويىن كەشەندەرىن شىعارۋ جوباسى;
زىكىر پەرنەگۇل كەمەلحانقىزى – «SabiSPA» گيدروماسساج جانە بوسانسۋ ورتالىعى;
يانىباەۆا اينۇر الىمبايقىزى – «ونەرىم–مۇرام» اتتى ۇلتتىق ناقىشتاعى سۋرەت جوباسى;
جۇماعالي ارۋجان ابىلبەكقىزى – قازاق مۋزىكاسىن تسيفرلاۋ جانە بالالارعا دومبىرا ۇيرەتۋ;
تولەنەۆا جانەركە قايراتقىزى – Narestem AI جۇكتى ايەلدەردىڭ جاعدايىن باقىلاۋعا ارنالعان جاساندى ينتەللەكت;
حابىلبەك ابۋxالي – RobotTime اۋىل بالالارىنا روبوتوتەحنيكا ۇيرەتۋ جوباسى;
يسادۋللاەۆا اليانۋرا مۇپتۋللامقىزى مەن ايدارحان جانسايا نۋردانعالىقىزى – بيوگۋمۋس ءوندىرۋ كاسىبى;
نارۋزوۆا نارگيزا — ەكولوگيالىق باعىتتاعى «جاسىل بولاشاق» جوباسى;
ءيمانمادي ءمولدىر – «جۋرناليست – جاۋ ەمەس» مەديا جوباسى;
ونەربەكقىزى نۇرگۇل – «مەديا ساۋات» باستاماسى بار.
بيىلعى گرانتتىڭ ەرەكشەلىگى – تەك دارىندى عانا ەمەس، ومىرلىك قيىندىقتارعا قاراماستان ءوز ارمانىنان باس تارتپاعان جاستاردىڭ جەڭىسىندە.
جەڭىمپازداردىڭ ءبىرى، قوناەۆ قالاسىنداعى بالالاردى قولداۋ ورتالىعىنىڭ تاربيەلەنۋشىسى نارگيزا نارۋزوۆا ءوز اسەرىمەن ءبولىستى:
«بۇل گرانت مەن ءۇشىن ۇلكەن مۇمكىندىك. مەنىڭ “جاسىل بولاشاق” جوبامنىڭ ماقساتى – ەكولوگيالىق مادەنيەتتى دامىتۋ، بالالار مەن جاستارعا تابيعاتتى قورعاۋدىڭ ماڭىزىن ءتۇسىندىرۋ. تاۋەلسىز ەلدىڭ ۇرپاعى رەتىندە ەل دامۋىنا ءوز ۇلەسىمدى قوسقىم كەلەدى. ال ءدال رەسپۋبليكا كۇنىمەن تۇسپا-تۇس كەلۋى – مەن ءۇشىن ەرەكشە مارتەبە»، – دەيدى جوبا جەتەكشىسى.
سالتاناتتى جيىندا الماتى وبلىسىنىڭ اكىمى مارات ەلەۋسىزۇلى سۇلتانعازيەۆ جاس جەڭىمپازداردى مەرەكەمەن قۇتتىقتاپ، ولارعا ساتتىلىك تىلەدى:
«رەسپۋبليكا كۇنى – ەلدىڭ ەركىندىگى مەن جاڭارۋ رۋحىنىڭ سيمۆولى. ال بۇگىنگى گرانت يەگەرلەرى – وسى تاۋەلسىز ەلدىڭ بولاشاعى. سىزدەردىڭ يدەيالارىڭىز قوعامعا سەرپىن بەرىپ، جاڭا قازاقستاندى قالىپتاستىرۋعا ۇلەس قوسادى دەپ سەنەمىن»، – دەدى ءوڭىر باسشىسى.
«تاۋەلسىزدىك ۇرپاقتارى» گرانتى – جاستاردىڭ جاڭا باستامالارىنا سەرپىن بەرىپ، ەلدىڭ ەرتەڭىنە ۇلەس قوساتىن ۇرپاق قالىپتاستىرۋدى ماقسات ەتەدى.
