قازاقستاننىڭ باس پروكۋراتۋراسى مارقۇم بولات نازارباەۆتىڭ ۇلى، ەكس-پرەزيدەنت نۇرسۇلتان نازارباەۆتىڭ نەمەرە ءىنىسى نۇربول نازارباەۆتىڭ اكتيۆتەرىنە قاتىستى جۇمىستار اتقارىپ جاتقانىن راستادى. بۇل تۋرالى باس پروكۋرور بەرىك اسىلوۆ ءماجىلىس دەپۋتاتىنىڭ ساۋالىنا بەرگەن رەسمي جاۋابىندا مالىمدەدى، دەپ حابارلايدى «ادىرنا».
24 قىركۇيەكتە ءماجىلىس دەپۋتاتى رينات زايىتوۆ نۇربول نازارباەۆتىڭ سوت شەشىمىمەن 57 ميلليارد تەڭگە كولەمىندەگى اكتيۆتەرىنەن ايىرىلعانىن جانە ونىڭ بارلىق بانك شوتتارى بۇعاتتالعانىن حابارلاعان بولاتىن.
دەپۋتاتتىڭ ايتۋىنشا، بولات نازارباەۆ پەن ونىڭ وتباسى الماتى قلاسى مەن الماتى وبلىسىنداعى جەر تەلىمدەرى جانە بازارلاردى رەيدەرلىك جولمەن يەمدەنۋى مۇمكىن. ول اسىرەسە “التىن وردا” بازارىنىڭ وسى اۋلەتپەن بايلانىسى تۋرالى قوعامدا تاراعان اقپاراتتارعا نازار اۋداردى.
زايىتوۆ باس پروكۋراتۋرادان نۇربول نازارباەۆتىڭ اكتيۆتەرىن تەكسەرىپ، زاڭسىز الىنعان مۇلىكتى مەملەكەتكە قايتارۋدى سۇراعان.
باس پروكۋرور بەرىك اسىلوۆتىڭ مالىمدەۋىنشە، زاڭسىز الىنعان اكتيۆتەردى قايتارۋ جونىندەگى كوميسسيا شەشىمىمەن 1,3 تريلليون تەڭگە كولەمىندەگى اكتيۆتەر بويىنشا شارالار قابىلدانعان.
اتاپ ايتقاندا:
- 750 ميلليارد تەڭگە جانە 103 ميلليارد تەڭگەنىڭ مۇلكى ەرىكتى تۇردە قايتارىلعان;
- 112 ميلليارد تەڭگە ءماجبۇرلى تۇردە ءوندىرىپ الىنعان.
«اكتيۆتەردى قايتارۋ بويىنشا جۇرگىزىلىپ جاتقان جۇمىستار تۋرالى اقپارات بۇقارالىق اقپارات قۇرالدارىندا زاڭمەن قورعالاتىن قۇپيالاردى ساقتاي وتىرىپ جاريالانىپ تۇرادى. بۇل جۇمىس ءسىزدىڭ ساۋالىڭىزدا اتالعان تۇلعالاردى دا قامتيدى. ءسىز كەلتىرگەن مالىمەتتەر اكتيۆتەردى زاڭسىز يەمدەنۋگە جانە ولاردى ەلگە قايتارۋعا قارسى ءىس-قيمىل بارىسىندا ەسكەرىلەدى», - دەدى بەرىك اسىلوۆ.
بۇعان دەيىن باس پروكۋروردىڭ ورىنباسارى عالىمجان كويگەلديەۆ ءماجىلىس دەپۋتاتى ابزال قۇسپاننىڭ “التىن وردا بازارىنىڭ رەيدەرلىك جولمەن باسىپ الىنۋى” تۋرالى مالىمدەمەسىنە تۇسىنىكتەمە بەرگەن بولاتىن. ول كەزدە كويگەلديەۆ:
«رەيدەرلىك باسىپ الۋ فاكتىلەرى راستالمادى»،- دەگەن ەدى.
