رەسپۋبليكا كۇنى مەرەكەسى قارساڭىندا قوعامدىق ماراپاتتار جونىندەگى رەسپۋبليكالىق كەڭەس پەن «ۋاقىت تاڭداۋى» اگەنتتىگى ۇيىمداستىرعان رەسپۋبليكالىق بايقاۋدىڭ قورىتىندىسى جاريالاندى. ناتيجەسىندە ەلىمىزدىڭ باسپا ىسىندە ايرىقشا ەڭبەگىمەن تانىلعان «اتامۇرا» كورپوراتسياسى «جىلدىڭ ۇزدىك باسپاسى» اتاعىنا لايىق دەپ تانىلدى، دەپ حابارلايدى «ادىرنا» ءتىلشىسى.
22 قازان كۇنى كورپوراتسيا شاڭىراعىندا سالتاناتتى جيىن ءوتىپ، قوعامدىق ماراپاتتار جونىندەگى رەسپۋبليكالىق كەڭەستىڭ توراعاسى مارات ءبايدىلداۇلى ماراپاتتى تابىس ەتتى.
«سىزدەرمەن ۇلىق مەرەكە – رەسپۋبليكا كۇنى قارساڭىندا جۇزدەسىپ وتىرعانىما قۋانىشتىمىن. ءبىز ەگەمەندىكتىڭ ارقاسىندا وسىنداي كۇنگە جەتىپ وتىرمىز. بيىل تاۋەلسىزدىگىمىزدىڭ 34 جىلدىعىن تويلايمىز. 1991 جىلدىڭ جەلتوقسانىندا «تاۋەلسىزدىك پەن مەملەكەتتىڭ ەگەمەندىگى تۋرالى» زاڭ قابىلدانسا، 1992 جىلدىڭ اقپانىندا «اتامۇرا» باسپاسى ومىرگە كەلگەن ەدى. 33 جىل ىشىندە كورپوراتسيا ۇلكەن شىعارماشىلىق جولدان ءوتتى. جۋرناليست، رەداكتور، اۋدارماشىلاردىڭ بىرنەشە بۋىنى وسى قارا شاڭىراقتا ءوسىپ جەتىلدى. ءبىز ساراپتاما جاساۋ بارىسىندا باسپانىڭ شىنايى تۇردە ۇلتقا قىزمەت ەتەتىنىنە كوز جەتكىزدىك. مىنە، سول سەبەپتى دە سىزدەر بايقاۋدا توپ جارىپ وتىرسىزدار. قاراپ وتىرسام، «اتامۇرا» 150-دەن استام قازاق جازۋشىسىنىڭ كىتابىن تەگىن جارىققا شىعارعان ەكەن. قازىرگى زاماندا كىم بۇلاي جاسايدى؟ بۇل – ءوز ۇلتىنا دەگەن سۇيىسپەنشىلىك پەن قۇرمەتتىڭ ناعىز كورىنىسى. باسپا 1,5 ملن تيراجبەن ءتۇرلى كىتاپ شىعارىپ وتىر. 2000 جىلدان كەيىنگى بۋىننىڭ بارلىعى دا «اتامۇرا» شىعارعان وقۋلىقتارمەن ءبىلىم الىپ، تاربيەلەندى. ءسوز جوق، بۇل – ۇلكەن ەڭبەك. قازىر ەكىنىڭ ءبىرى «قازاقستاندا ۇلتتىق يدەولوگيا جوق» دەپ ايتۋعا اۋەس. ال، شىن مانىندە، ونى ناقتى ىسىمەن جۇزەگە اسىرىپ، ۇلت رۋحانياتىن جۇيەلى تۇردە ناسيحاتتاپ كەلە جاتقان ۇجىم – «اتامۇرا» باسپاسى دەر ەدىم»،– دەدى ول.
مارات ءبايدىلداۇلى «جىلدىڭ ۇزدىك باسپاسىن» حالىق تاڭداعانىن ەرەكشە اتاپ ءوتتى.
«كوپشىلىككە بەلگىلى «نوبەل» سىيلىعى – قوعامدىق ماراپات. سول سياقتى ءبىز ۇسىنىپ وتىرعان «جىلدىڭ ۇزدىك باسپاسى» اتاعى دا حالىقتىڭ تاڭداۋى ارقىلى بەرىلەدى. بۇل – وقىرماننىڭ سەنىمى مەن قۇرمەتىنىڭ ايعاعى»،- دەپ تولىقتىردى كەڭەس توراعاسى.
سونداي-اق ءىس-شارا بارىسىندا قازاقستاننىڭ ەڭبەك سىڭىرگەن قايراتكەرى قۇل-مۇحاممەد راقىمعالي ابرارۇلىنا ۇلت رۋحانياتى مەن باسپا ىسىنە قوسقان ايرىقشا ەڭبەگى ءۇشىن «ۇلت قايراتكەرى» مەدالى سالتاناتتى تۇردە تابىستالدى. ءوز سوزىندە مارات ءبايدىلداۇلى بۇل ماراپاتتىڭ ۇلتتىق مادەنيەت پەن ادەبيەتتىڭ دامۋىنا ۇلەس قوسقان زيالى قاۋىم وكىلدەرىنە دەگەن قۇرمەتتىڭ جارقىن كورىنىسى ەكەنىن مالىمدەدى. ودان بولەك، ول راقىمعالي ابرارۇلىنىڭ ۇزاق جىلدار بويى باسپا ءىسىن دامىتۋ جولىندا قاجىرلى ەڭبەك ەتكەنىن، قازاق وقىرمانىنا ارنالعان مىڭداعان قۇندى ەڭبەكتىڭ جارىق كورۋىنە جەتەكشى بولعانىن اتاپ ءوتتى.
ءوز كەزەگىندە كورپوراتسيا پرەزيدەنتى بۇل ماراپاتتىڭ ءمانى ەرەكشە ەكەنىن ايتتى.
«بۇل – مەنىڭ عانا ەمەس، بۇكىل ۇجىمنىڭ ەڭبەگىنە بەرىلگەن باعا. ءبىز بىرىگىپ، ءبىلىم سالاسىنداعى تالاي بيىكتى باعىندىرىپ كەلەمىز. الدا اتقارار جۇمىستارىمىز ءالى دە كوپ. ايتا كەتەرلىگى، ەشقاشان مادەنيەت سالاسىنداعى بىردە-ءبىر تەندەرگە قاتىسقان ەمەسپىز. وسى كۇنگە دەيىن ءوز كۇشىمىزبەن، ءوز قارجىمىزبەن العا جىلجىپ كەلەمىز. بۇل – ءبىزدىڭ ۇجىمنىڭ تاباندىلىعى مەن ادالدىعىنىڭ ايعاعى»، – دەدى راقىمعالي ابرارۇلى.
ەسكە سالايىق، 23 ساۋىردە «اتامۇرا» مادەنيەت جانە اقپارات مينيسترلىگى ۇيىمداستىرعان رەسپۋبليكالىق ءىس-شارادا «ۇزدىك باسپا» اتاعىنا يە بولعان ەدى.
«اتامۇرا» – قازاقستانداعى ەڭ ءىرى ءارى بەدەلدى باسپا كورپوراتسيالارىنىڭ ءبىرى. 1992 جىلى 4 اقپاندا قۇرىلعان بۇل ۇيىم تاۋەلسىز ەلىمىزدىڭ رۋحاني وسۋىمەن بىرگە قالىپتاسىپ، بۇگىندە جيىرمادان استام كاسىپورىندى بىرىكتىرگەن ءىرى حولدينگكە اينالدى. بۇگىندە «اتامۇرا» جىل سايىن 1,5 ميلليوننان استام كىتاپ پەن 50 ميلليونداي پوليگرافيالىق ءونىم شىعارا وتىرىپ، ەلىمىزدىڭ بارلىق وڭىرىندە ورنالاسقان 40-تان اسا كىتاپ ءۇيى ارقىلى وقىرمانمەن تىكەلەي بايلانىس ورناتىپ وتىر.
باسپا – تەك وقۋلىقتار مەن ەنتسيكلوپەديالاردىڭ عانا ەمەس، كوركەم ادەبيەت پەن عىلىمي ەڭبەكتەردىڭ دە سەنىمدى باسپاگەرى. «اباي»، «استانا»، «مۇحتار اۋەزوۆ» سەكىلدى ەنتسيكلوپەديالار مەن «اتامۇرا كىتاپحاناسى» سەرياسىمەن جارىق كورگەن جۇزدەگەن تۋىندىلار – سونىڭ دالەلى. حالىقارالىق جانە وتاندىق ماراپاتتاردىڭ يەگەرى اتانعان «اتامۇرا» ساپا مەن رۋحانياتتى باستى قۇندىلىق ەتكەن ۇلتتىق برەند ەكەنىن اتاپ وتكەن ءجون.
